Бөтенроссия Коръән укучылар һәм хафизлар бәйгесендә илнең 14 төбәгеннән вәкилләр катнаша

(Казан, 12 февраль, "Татар-информ"). 21-22 февральдә IX Казан Бөтенроссия Изге Коръән укучылар һәм хафизлар бәйгесе узачак. Быел ул борынгы Болгар шәһәрендә үткәрелә. Бу турыда ТР Диния нәзарәтенең матбугат хезмәте хәбәр итә.

Бәйгедә Россиянең 14 төбәгеннән – Татарстан, Башкортстан, Чечен, Дагыстан, Ингушетия, Кырым республикаларыннан, Ставрополь һәм Пермь крайларыннан, Мәскәү, Чиләбе, Иваново, Саратов, Тула һәм Свердловск өлкәләреннән барлыгы 30га якын кеше катнашыр дип көтелә. Катнашучыларның иң кечесенә 11 яшь, иң өлкәненә – 34.

Чараны Ислам Лигасының Бөтендөнья Коръән-хафизлар һәм Сөннәт эшләре оешмасы, Болгар ислам академиясе, ТР мөселманнары Диния нәзарәте һәм «Коръән нуры» хәйрия фонды оештыра.

Бәйге ике номинация буенча уздырыла: «Изге Коръәнне дөрес итеп уку» һәм «Изге Коръәнне тулысынча яттан белү». Анда Россия Федерациясе гражданнары булган ир-егетләр катнаша ала. Җиңүчеләргә кыйммәтле бүләкләр һәм акчалата призлар тапшыру күздә тотыла. Моннан тыш, һәр катнашучыга истәлекле бүләкләр каралган.

Оештыручылар шулай ук массакүләм мәгълүмат чаралары вәкилләре арасында IX Казан Бөтенроссия Изге Коръән укучылар һәм хафизлар бәйгесен иң яхшы яктыртуга бәйге игълан итә. Ул өч номинациядә узачак: «Видеорепортаж», «Интернет-басма», «Басма хезмәтләр».  Эшләрне түбәндәге электрон почтага җибәрү сорала: svet.korana@yandex.ru. Барлык сораулар буенча элемтәгә керү өчен телефон: +7 (903) 305-22-64.

Оештыручылар теләге булган һәркемне Коръән-хафизлар бәйгесен күрергә чакыра. Бушлай хәрәкәт итү чарасы – трансфер булдырылачак. Мөрәҗәгать итү өчен телефон: +7 (987) 296-48-45 (Илдар хәзрәт).