Почтальон алыштыргысыз, почтальон кирәкле

(Тәтеш, 7 декабрь, "Тәтеш таңнары, Ирина Ефимова). Бүген без шәһәрдәге почтальоннарның хезмәте хакында сөйләрбез. Тәтешнең поч­та эшкәртү һәм ташу цехы начальнигы На­талья Щербакова хәбәр иткәнчә, шәһәр 15 илтү участогына бүленгән, аларга 16 хат ташучы хезмәт күрсәтә.

Почта хезмәткәрләре үзләренең эш көннәрен сәгать сигездә башлый. Төрле коррес­понденцияләрне таратыр алдыннан алар башта килгән почтаны тәртипкә китерә. Ә аннары, иртәнге сәгать 10нар тирәсендә, үз участоклары буенча барлык корреспонденцияләрне таратырга өлгерер өчен, шәһәр урамнарына чыга. Әгәр үтелгән юлны уртача алып исәпләсәк, хат ташучы  гәҗит-журналлар белән бергә 3тән алып 6 кило авыр­лыктагы сумканы  күтәргән килеш йөри һәм якынча 4-5 ­сәгать вакытын сарыф итә. 

“Почтальоннарның коллективы дус, – ди Наталья Николаевна. – Людмила ­Борисова, Гүзәл Гәзизуллина, Иван Зиновьев, Галина Клементьева, Нина Матина, Наталья Пронина кышкы бураннарда һәм җәйге эсселәрдә үзләренең хезмәтләрен берничә ­дистә елдан артык алып бара. Әгәр берәрсе чирләп китсә, кешеләрне корреспонденция­ләрсез калдырмас өчен, аның участогына бөтен коллектив чыга”.

Алар үзләре йөри торган урамнардагы һәр­кемне дә диярлек исеме һәм әтисенең исеме белән генә түгел, хәтта алар тормышындагы кайбер мәгълүматларны да беләләр. Пенсио­нерлар өчен по­чтальон – “үз кеше”. “Шундый чак­лар була, пенсия яки хат китерсәң, аралашмыйча һич кенә дә китеп булмый, – дип уртак­лаша хат ташучылар. – Ягымлы итеп каршы алган өйләргә керү дә күңелле”.

Баш мөхәррир Инга Сәфәровадан призлар белән “Авангард” гәҗите редакциясе тарафыннан һәр ярты еллыкта уздырыла торган район күләмендәге почтальоннар бәйгесе матур гадәткә кертелде. Абунә кампаниясен билгеләнгән планнан арттырып үтәү – төп шарт. Светлана Филиппова (рәсемдә: икенче рәттә уңнан беренче) агымдагы ярты еллык­та “Тәтеш шәһәренең иң яхшы почтальоны” номинациясендә җи­ңүче булды. “Үземнең учас­токта ике күп фатирлы йортны йөреп чыгам, ә калганнары – шәхси сектор, шулай итеп барлыгы өч йөздән күбрәк адресат булып чыга. Үз көчемне тигез файдаланыр өчен, почтаны әйләнеп кире кайтмаслык итеп таратырга кирәк. Шундый маршрут буйлап мин 11 ел йөрим, – дип сөйли Светлана Василь­евна. – Элек “Авангард” басылып чыккан көндә шулкадәрле чакрым узуымны уйламаган да идем, ә хәзер сәламәтлек беләзеге күрсәткече буенча белдем – 15 чакрым. Зарар юк, бары тик тәтешлеләр генә гәҗитне рәсмиләштерсен иде, чөнки районның ничек яшәвен һәркемгә белү ­зарур”. 

Аның әйтүенчә, аңа хәзер сирәк килә торган бәйрәм открыткаларын һәм күптән көтеп алынган хатларны хуҗаларына тапшыру, моңа җавап буларак рәхмәт сүзләрен ишетү һәм елмаюлы йөзләрне күрү икеләтә күңелле. Ә безгә елның теләсә кайсы вакытында почта әр­җәләребезгә килгән гәҗитләрнең яңа саны һәм хатлар өчен поч­тальоннарга рәхмәтне еш­рак ­әйтергә кирәк.