Шәһәр йөзен үзгәртә
Узып баручы елда Тәтештә яңа йортлар, юллар, тротуарлар барлыкка килде.
Күп катлы иске йортларда яшәүчеләр дә үз торакларын төзекләндерүдә уңай үзгәрешләрне тойдылар. 2011 елда капиталь ремонт программасы буенча җиде йортның тышкы ягы матурланды һәм коммуникацияләре яңартылды. Ремонтка 8 миллион 711 мең сум тотылды. Егерме йортка җылылык һәм суны исәпкә алучы уртак приборлар урнаштырылды.
Тәтешкә 200 ел, Ленин исемендәге һәм башка урамнарда тротуарлар салуга 1 миллион сумнан артык тотылды. Күл, К. Либкнехт, Гоголь, Чернышевский, Мәктәп һәм башка урамнарга асфальт җәелде.
Урамнарны яктырту мәсьәләсендә дә уңай үзгәрешләр бар. Йөздән артык яктырткыч урнаштырылды, бу эш дәвам иттерелә. Кайбер урамнарда һәм Питомникта электр челтәрләре яңартылды. Зиратларны төзекләндерү, коеларны ремонтлау, куаклар утырту эшләре алып барылды, дүрт йөздән артык карт һәм корыган агачлар киселде.
Каты көнкүреш калдыкларын җыю урыннарын чистартуга зур игътибар бирелгән. "ТетюшиЖилсервис" ҖЧҖда барлыгы 37 мәйданчык бар, аларда 160 контейнер һәм 74 бункер урнаштырылган. Шәһәр башкарма комитетының эшләр белән идарә итүчесе Дмитрий Пирогов хәбәр иткәнчә, чүп-чарны вакытында чыгару өчен яңа техника сатып алу мөмкинлеге табылган. Әмма тәтешлеләр һич тә тәртипкә өйрәнә алмыйлар әле. Тиешсез чүп түгү урыннарын бетерүгә генә дә 205 мең сум сарыф ителгән. Үзебезгә-үзебез зыян китерәбез бит. Бу акчаларны тротуарлар салуга яки балалар мәйданчыкларын төзекләндерүгә файдаланып булыр иде!
Төзекләндерү буенча шәһәр башкарма комитеты эшенә бәя биреп, район башлыгы Мөхәррәм Ибәтов шәһәрне төзекләндерү буенча кабул ителгән карарларның тулы көчкә эшләвен билгеләп үтте. Хуҗасыз территорияләр, кеше тормый торган йортлар булмаска тиеш. Административ йогынты чаралары куллану өчен шәһәр хакимиятенең бөтен вәкаләте бар. Тирә-яѓы җыештырылган, чиста йортлар башкалар өчен үрнәк булырга тиеш. Урамнарны төзекләндерүдә, үз мөмкинлекләрен файдаланып, шәһәр оешмалары һәм предприятиеләре җитәкчеләре дә ярдәм итә алалар. Район башлыгы төзү эшләре белән шөгыльләнүчеләргә корылмаларның, ремонтлана торган йортлар һәм офисларның тышкы күренешенә җитди игътибар итүләрен теләде. Тарихи һәм архитектур һәйкәлләр саналган биналарга аеруча сак карау зарур.
Шәһәр үзенең йөзен үзгәртә, аның проблемаларына карата шәһәрлеләрнең дә мөнәсәбәтләре шулай ук мөһим, моның өчен күп соралмый: аңа хуҗаларча һәм игелекле ният белән генә карарга кирәк. Чәчәкләр утыртыгыз, тротуарларны себерегез, кышын өегез яныннан үтеп йөрүчеләр һәм үзегез өчен сукмакларны кардан чистартыгыз - болар катлаулы эшләр түгел. Туган шәһәрең турында кайгырту кебек игелекле уртак эштә катнаша алуыгыздан үзегезгә дә рәхәт булачак.
