Хөкем ителүчеләр эскәмиясенә илтүче юл

Алимент буенча хөкем ителүчеләр эскәмиясендә хатын-кызлар... Бу сүз акылга сыймаслык булып ишетелә. Алимент җәмәгатьчелек аңында гаиләсеннән киткән, балаларын ташлаган ир-ат образы белән бәйле. Әмма җәзаларны үтәүне күзәтү инспекциясе хезмәткәрләре алимент түләүче хатын-кызларның арта баруына инде гаҗәп­ләнмиләр. Бу шундый аналарның үзләрен дә борчымый, алар сабыйлары турында кайгыртуны әби-бабаларына йөклиләр, өлкәннәр дә юньсез балаларының хокукларын чикләүне һәм опекунлыкны үзләренә рәсмиләштерүне сорыйлар. Мәсәлән, район комиссиясе утырышында Б. авылыннан нишләргә аптыраган карчык килгән. Ул дүрт оныгына (олысына - 9, кечесенә - 3 яшь) ярдәм сораудан бигрәк, кызын, имеш апрель аенда юкка чыккан, табу юлларын эзләде, ә тегесе әнисе белән сөйләшүдән качып, СМСкалар гына җибәрә икән. Төрле банк­лардан әҗәтне түләүне таләп итеп килгән конвертлар да карчыкны хавага сала. Кызы, балаларын аз пенсия алып яшәүче, картайган ата-анасына калдырып, акча эшләргә дип билгесез якка еш чыгып китә икән, әмма сабыйлар аңардан бер тиен акча күрмиләр. Аталары да алар белән яшәми. "Югалган" ата-ананың дүрт балага булган хокукларын чик­ләү турында материаллар җыю эше башланды.

Менә башын-күзен буяган 20 яшьлек В., барсы да ирем белән бәхәсләшүдән килеп чыкты дип комисс­ияне ышандырырга тырыша. "Башка алай эшләмим", - дип, балалар кебек кабатлый ул. Аның кызы әбисе белән яши. "Менә эшкә урнашам да, яныма алдырам", - дип ант итә, тик үзенә яраклы эш кенә таба алмый икән. Гаилә, социаль яктан тотрыксыз буларак, ведомствоара исәпкә куелган. Росс­ия Эчке эшләр министрлыгының район бүлегеннән кергән белешмәләр нигезендә "геройлар", ата-ана вазифасын үтәмәгәннәре өчен, административ җәзага тартылдылар - 100 сум штраф һәм кисәтү белән котылдылар. Бары шул.

Күпләр өчен хөкем эскәмиясенә юл шулай башлана. Район мировой судьясының быелгы карары - бер-берсенең күчермәсе кебек. Алиментчы хатын-кызларның уртача яше - кырык. Белемнәре - урта махсус. Барсы да аракы ярата. Эшләргә теләмиләр. Башчы авылыннан 1979 елгы ханым фермада бозау караучы булып барсыннан да күп - 28 көн эшләгән. Әхлаксыз тормыш белән яшәү җиңел һәм күңелле, күрәсең. Гаҗәпкә каршы, андый хәсрәт аналар төзәтү эшләренең иректән мәхрүм итү турындагы суд карары белән алыштырылуына да битарафлар, әйтерсең лә, колониягә түгел, ялга баралар. Тик менә шунда эләккәч, алар балалары алдындагы изге бурычларын, сабыена ӘНИ кирәклеген исләренә төшерерләр микән.Шикле...