Игътибар кирәк

(Тәтеш, 22 октябрь, “Тәтеш таңнары”, Наталья Дубкова). Тәтеш шәһәренең Көньяк урамында, 10нчы йорт янәшәсендә,  гражданнарның үзара салым акчасына күптән түгел балалар мәйданчыгы ясап куелды. Бала-чагалар моңа бик сөенде. Әмма, сабыйлар төрле җәрәхәтләр алмасын өчен, мәйданчык төзелешенә билгеләнгән җир кишәрлеге чокырларсыз – тигез, ә мәйданчык – бәрелүдән зыян килми торган өслек белән җиһазланган булырга тиеш.

Яктырткычлар буенча да сораулар бар. Хәзер тиз караңгылана, балалар мәйданчыгында яктылык җитәрлек түгел. Ата-аналар сабыйларының тулысынча куркынычсызлыгына ышанычлы булсыннар иде диясе килә.
   

“Барлык сораулар буенча алга таба да эшләячәкбез һәм тәртипкә китерәчәкбез”, – дип җавап бирде безнең мөрәҗәгатькә шәһәр башкарма комитетының эшләр белән идарә итүчесе Фәрит Гарифуллин.