Ил-көннәр тыныч булсын

Анда бу көнне авылның яше­дә, карты да җыелды. Табигать гүзәллегендә урнашкан мәйданга мул табын корылды, учакка асылган казанда хуш исләрен таратып, корбан шулпасы пеште.

Авылдашларын олуг бәйрәм белән тәбрикләп, авыл имамы Фәһим хәзрәт Галимов Коръән аятьләре укыды, һәркемнең хөрмәтен яулаган Ркоя абыс­тай Хисамиева үтемле итеп вәгазь ирештерде. Күңелләрне сафландыр­ган, әрвахлар рухына кылынган догалар, ил-көннәр тыныч булсын дигән теләкләр, әлбәттә инде, чын күңелдән башкарылды.

Әби-бабайлар, абый-апа­лар янына башлангыч мәктәп укытучысы Румия Әмерханова җитәкчелегендә укучылар да килде. Милли киемнәр кигән балалар әдәп-әхлак турында сәнгатьле итеп шигырьләр сөйләде, ә мәдрәсәгә йөрүче хатын-кызлар йөрәкләрне нечкәртерлек мөнәҗәтләр көйләде. Ул да түгел, корбан ашы да әзер булды. Мәдәният хезмәткәрләре һәм авыл уңганнары бәйрәмгә килгән һәркемне кунак иттеләр, хөрмәт күрсәттеләр.