Йөрәктән-йөрәккә

Казан шәһәренең инвалидларны тернәкләндерү "Возрождение" үзәгеннән чынлап та бердәнбер төркем - сәламәтлекләре буенча мөмкинлекләре чикләнгән кешеләрдән торган җыр һәм бию ансамбле килде. Җитәкчеләре Ве­ра Мигулина катлаулы язмышлы кеше, ул - Дахау концлагере тоткыны. Ул үзенең катнашуы белән рухи һәм физик газап­лар кичерүче кешеләрнең тормышларын җиңеләйтергә омтыла. Лаеклы ялга чыккач, ялгызлыгын ишек артында калдырып, чирләренә дә игътибар итмичә, хәйриячелек белән шөгыльләнә, искиткеч ансамбльләр төзеп, үз хисабына республиканың социаль учреждениеләре буйлап йөри. Бу төркемгә килеп кушылган һәркем биредә кала, башкаларга кирәкле булырга омтыла. Ятимнәрнең, ялгыз, авыру кешеләрнең елмаюлы йөзләре һәм алкышлары артистлар өчен иң зур бүләк. "Үз төркемебезгә таң алиһә­се хөрмәтенә "Аврора" дигән исем бирүебез дә юкка түгел. Безнең костюмнарыбызда сары төсләрнең күбрәк булуына игътибар иттегезме? Алар ялгыз һәм авыру йөрәкләрне җылытучы нурлар кебек. Игелеклелек һәм сөенеч сукмагын тап һәм кемгәдер шуны табарга ярдәм ит...", - дип сүзен тәмамлады Вера Алексеевна.

Кечкенә генә җыйнак залда рус, чуаш, татар җырлары яңгырады. Надежда Семенова җырларны халыкчан башкарып, һәркемнең күңелен җәлеп итте. Роза Миңнеханованың романсларын да йотылып тыңладылар. Олы яшьтәге Сания Ибраһимованың яшьләрчә җилкенеп "Цыганочка"ны биюен күргәч, зал җанланып китте. Сергей Крайновны тыңлаганда тамашачылар яшертен генә күз яшьләрен сөртеп алдылар. Чөнки ул бөтен җырларын умыртка баганасының авыртуына бирешмичә һәм таякка таянып баскан килеш башкарды. Артистларның сәхнәгә чыгуын алкышлар белән каршыладылар, ә алар барсы да елмаеп килеп чыктылар. Бары тик грим салу бүлмәсендә генә һәр чыгышның аларга нинди авырлыклар белән бирелүен сизәргә мөмкин булды. Социаль яклау идарәсе начальнигы Ольга Илларионова һәм интернат-йорт директоры Людмила Самаркина иҗади бүләкләре өчен аларга зур рәхмәт белдерделәр, соңгысы "рухи җылылык хәйриячеләре" дип тә өстәде.

Интернат йортның еш кунаклары - Олы Шәмәк урта мәктәбе укучылары бу юлы да үзләренең чыгышлары белән сөендерделәр. Китапханәче Ирина Тимескова һәм авыл мәдәният йорты директоры Галина Воробьева белән алар "Сезнең алтын көзегез" дип исемләнгән концерт программасы әзерләгәннәр. Кешеләргә яхшылык эшләргә омтылган балаларның һәм тормыш тәҗрибәсе туплаган кешеләрнең бер сәхнәдә булулары тәрбия өлкәсендә зур роль уйный. Мондый очрашулар яшь буынга өлкәннәр өчен җаваплылык хисен аңлау­да, аларның яшен һәм хезмәтләрен хөрмәтләү буларак, бик тә мөһим.