Тэтэш таннары
  • Рус Тат
  • Изге максатка җитәргә дә күп калмаган

    Узган ел "Нур" агрофирмасында акча керемендә сөт өлеше кырык проценттан артык тәшкил иткән.

    Биредә сөт юнәлеше төп тармак санала һәм аны үстерү өчен бөтен мөмкинлекләр дә тормышка ашырыла. Районда беренчеләрдән булып "Де Лаваль" фирмасы саву җайланмасы урнаштырдылар, такта идәннәрне заманча җылы идәннәр белән алыштырдылар. Азык тараткыч сатып алдылар, ул әле тагын зур булмаган азык цехы эшен дә башкара: сусыл һәм тупас азыкларны турый, вакланган бөртек катнашмасы, төрле азык өстәмәләре белән бергә куша. Рационны аксымнар белән баету өчен көнбагыш түбе кайтарганнар. Механизатор Рәфикъ Гыйззәтуллин (рәсемдә) шушы җайланма ярдәмендә өченче ел инде азык тарата. Узган ел азык кытлыгын балансланган шул рацион нигезендә җиңәргә мөмкин булды дип ышандыра ул. Хәзер азыкны көнгә ике тапкыр тараталар, һәм шул җитә. Азык җитешмәгәндә, кардада сыерларга печән һәм салам җитәрлек.

    Ә көзен, октябрь-ноябрьдә, шундый ук шартларда көнгә өч тапкыр ашатырга туры килгән. Күрәсең, сыерлар организмнарын озын кышка әзерләгәннәр.

    Былтыр Хамисә Кәбирова, Резидә Бәдретдинова, Тәнзилә Мөхәммәтшиналар һәр сыердан уртача 5000 килограммнан күб­рәк сөт сауганнар, алар быелның гыйнвар аенда да алда барганнар. Гөлнара Сабирова танылган осталарны куып җитәргә тырыша. Гөлфирә Садыйкова һәм Люция Сафиналар тана сыерлар белән эшләгәнлектән, аларның "йолдызлы сәгатьләре" алда әле.

    Узган ел коллектив сөт савып алуны 2010 ел дәрәҗәсендә саклый һәм аны хәтта 1 процентка арттыра алган. Хуҗалыкта һәр сыердан уртача 4613 килограмм сөт савылган, бу район күрсәткеченнән 842 килограммга артык.

    Гыйнварда сөт кимүгә юл куелмаган. Озакламый рационга сөтне арттыручы азык чөгендере өстәләчәк, ул майга кадәр җитәчәк. Башка азыклар запасы ел ярымлык итеп әзерләнгән. Алар барсы да беренче класслы, Казанда лабораториядә үткәрелгән тикшерү нәтиҗәләре дә шуны дәлилли.

    Терлекчеләр савымның артачагына ышаналар. Хәер, бу юнәлештә билгеле бер уңай үзгәреш инде сизелә. Һәр сыердан бер пот сөт савып алу кебек изге максатка җитү өчен бик аз- 500 грамм гына калган.

    Теги: undefined
    Нравится
    Поделиться:
    Реклама
    Комментарии (0)
    Осталось символов: