Күңелләрне сафландырып

Шәһәрдәге үзәк мәчеткә җыелучыларны район башлыгы Рәмис Сафиуллов та котлады. "Бабайлар һәм әбиләр яшьләр өчен һәрчак үрнәк булды. Алар дөрес юлдан тайпылмыйча, халкыбызның гореф-гадәтләрен саклап, буыннан буынга тапшыруга зур өлеш кертә. Мәчетләребез гел шулай тулып торсын, туган җиребез тагын да матурайсын, изге эшләр Рамазан ае белән генә чикләнмәсен, - диде ул һәм бәйрәм белән тәбрикләп, исәнлек-саулык, бәхет-шатлык, дөньяларның имин булуын теләде.

Тигез сафларга басып, яше-карты гает намазы укыды, тәкъбир әйтте. Районның мөхтәсибәт имамы Инсаф хәзрәт Җәләлетдинов хөтбә укыды.

- Рамазан ае гөнаһлардан чистарынып, яхшылыклар кылып, күбрәк савап эшләп калырга мөмкинлек бирде. Хәер-сәдака исә динебезнең аерылмас бер өлеше булып тора. Ураза бетте дип, гыйбадәтләрне киметмик, йортларыбызда, мәчетләребездә намазлар укып, йөзләребезне нурландырыйк, - дигән теләктә калды Инсаф хәзрәт.

- Тормыш ыгы-зыгысында дуслар белән күрешергә, кунакка йөрешергә вакыт та калмый. Мәчеттә очрашу, гаетләргә бару дин кардәшләребез өчен әҗер-саваплы булса, балаларыбызга әхлакый, тәрбияви яктан файдалы, - дип фикерләре белән уртаклаштылар бәйрәмгә килгән тәтешлеләр.

Җыелучылар ахырдан кул бирешеп бер-берсен ураза бәйрәме белән тәбрикләп хушлаштылар.