Мартта комсомол туен уздырганнар

(Тәтеш, 21 март, «Тәтеш таңнары»). 

–     8 Март бәйрәме узып китте. Ул бик мөһим һәм кирәкле, әлбәттә, – дип яза безгә шәһәрле Илгизәр Галиев. – Шулай да икенче көн – 9 март безнең гаилә өчен тагын да әһә­миятлерәк. Беренчедән, ул яраткан хатыным Лениза Фәләх кызының туган көне, икен­чедән – безнең туй үткәргән көн. 

Без 1963 елда,  институтта укыганда, комсомол туен уздырдык. Без аны институт ашханәсендә бәйрәм иттек. Шатлыгыбызны уртак­лашырга 70 кеше чакырдык: безнең төркемнәрдән студентлар, дуслар, профессорлар бар иде. Шул вакыттан алып инде 58 ел узган, шушы гомер эчендә без иңгә-иң куеп тормыш юлы үттек, ике ул тәрбияләп үстердек, аларга югары белем алырга ярдәм иттек. 
Еллар сизелми дә уза, янәшәңдә якын кешең булу ничек рәхәт.