Телемнең байлыгы халкымның мәдәниятен, тарихын, әдәбиятның үзенчәлекләрен ача.
Туган телне кадерләгән халык - кадерле булыр, диелә мәкальдә.
Мин Татарстанда яшим. Без төрле милләт вәкилләре белән дусларча аралашабыз, бергә мәктәптә укыйбыз, уйныйбыз, төрле файдалы чараларда катнашабыз. Һәркайсыбыз рус телендә аралаша, барыбыз да диярлек татарча сөйләшә ала һәм аны яхшы аңлый.
Һәр ел саен илебездә 21 февральдә Халыкара туган тел көне билгеләп үтелә. Бу халыкларның гореф-гадәтләрен, йолаларын, авыз иҗатын һәм туган телне саклау өчен зур этәргеч булып тора. Әлеге уңайдан мин берничә укучы һәм мәктәп хезмәткәре белән әңгәмә кордым. Аларны сезгә дә җиткерәсем килә.
- Туган телне ни өчен белергә кирәк?
- Тел һәм гореф-гадәтләр безне буыннар чылбыры белән бәйли. Аларны сакламасак, яшьләр үз тарихларын белмәячәк һәм милләт буларак югалачак (Гүзәл, 17 яшь).
- Нинди телләрдә аралашасың?
- Үземнең чуаш телендә иркен сөйләшәм. Өстәвенә рус, татар телләрен дә әйбәт беләм, инглизчә өйрәнәм. Телләр белү - зур шатлык (Валентина, 14 яшь).
- Әдәби әсәрләр уку ни өчен кирәк?
- Геройларның уй-фикерләре, эш-гамәлләре аша тормыштагы гыйбрәтле хәлләр турында беләбез. Аларның чишелешен аңлыйбыз. Матур әдәбият кешене әдәп-әхлакка, намуслы булырга өйрәтә, яхшы сыйфатлар тәрбияли. Аның эчке дөньясын, сөйләм телен баета (Зөмәрә, 43 яшь).
- Үзең һәм якын кешеләрең гомер иткән төбәктә яшәүче халыкларның телен, йоласын өйрәнү кирәкме?
- Әлбәттә. Беренчедән, бу бер-беребезгә хөрмәт уята. Икенчедән, башкалар әңгәмә корганда алар белән рәхәтләнеп аралашыр өчен кирәк. Минемчә, күп телләр белү тормышыбызны тагын да күбрәк матурлый, рухи көч өсти. Шәхсән мин рус, немец, татар телләрендә җиңел аралашам (Евгений, 31 яшь).
Әйе, нинди генә милләт кешесе булсак та, туган тел һәркайсыбыз өчен якын, һәм ул бертөрле мәгънәдә яңгырый.
Нет комментариев