Сакланып яшик
Фатирлар яки йортларга караклар керүдән беркем дә иминиятләштерелмәгән, ә менә әлеге хәлне булдырмау куркынычын һәркем эшли ала.
(Тәтеш, 21 июня, «Тәтеш таңнары», Мәдинә ИБӘТУЛЛИНА). Үз торагыңны ничек караклардан сакларга кирәклеге хакында аңлатуын сорап, без район прокурор ярдәмчесе Динар Низамовка мөрәҗәгать иттек.
– Динар Әгъзаметдинович, тәтешлеләрне нинди һәм кайчан күңелсез вакыйгалар сагалап торырга мөмкин?
– Әлеге хәлләр барыннан да ешрак караклык гамәлен җинелрәк эшләп була торган фатирларда килеп чыга: ишеге ышанычсыз бикләнгән, бикләвече гади, сигнализациясе булмаган, беренче яки соңгы катта тәрәзәләре рәшәткәләр белән томаланмаган фатирларда. Хәзерге фатир караклары зур күләмле әйберләрне алмыйлар, ә акча яки кыйммәтле “хәзинәләрне” өстен күрәләр. Бәйрәм һәм ял көннәрен, җәйге отпуск, дача вакытларын угрылар аеруча да “уңышлы” вакыт дип саныйлар, чөнки хуҗалар бу чакта өйдә булмыйлар. Фатирларны кешеләр эштә чакта “чистартып” чыгу очраклары да еш була. Кагыйдә буларак, каракка “эшләү” өчен 5тән 15 минутка кадәр вакыт җитә.
– Булачак корбаннары турындагы мәгълүматны җинаятьчеләр ничек белә?
– Угрылар хуҗаларның яшәү рәвеше, аларның тораклары ничек саклануы, сак сигнализациясе бармы икәнлеге турындагы мәгълүматны туплыйлар. Хәтта сезнең артыгыздан яки фатирыгызны күзәтеп йөрергә, яшәүчеләр хакында күршеләрдән, танышлардан, йорт янындагы эскәмиядә утырган әбиләрдән сорашырга мөмкиннәр.
– Әгәр көтелмәгән “кунаклар” булуы ачыкланса, нәрсә эшләргә кирәк?
– Кичекмәстән полиция хезмәткәрләрен чакырыгыз! Бернәрсәгә кагылмаска, җинаять гамәлләрен, бармак эзләрен төшерү һәм тикшерү өчен әһәмиятле кайбер мәгълүматларны саклау максатында, аларның килүен тышкы якта көтеп торырга тырышыгыз, чөнки болар җинаять кылуга кагылышлы затны ачыкларга ярдәм итәчәк.
– Сез нинди күрсәтмәләр бирер идегез?
– Район прокуратурасы ялга китәр алдыннан саклану чаралары күрү зарурилыгын киңәш итә. Фатирыгызны, керү ишекләренең ватылмавын карап торуны күршеләрегезгә әйтеп, аларга килгән кәгазьләр, гәҗит-журналлар җыелып ятмасын өчен почта әрҗәсенең ачкычын, үзегезнең ышанычлы кешеләрегезгә вакыт-вакыт фатирыгызны карап-күзәтеп торсынга ачкычыгызның күчермәсен калдыру зарур. Һәм, иң мөһиме, сигнализация куйдыру мөмкинлеген булдырырга тырышыгыз, чөнки хәзерге вакытта фатирларны саклауның бу иң ышанычлы ысулы.
Следите за самым важным и интересным в Telegram-каналеТатмедиа
Нет комментариев