Шәһәр урамнарында хәрәкәт зур

Әмма шуны да әйтергә кирәк, ЮХИДИ хезмәткәрләре үз эшләрен сизелерлек активлаштырдылар, моны җәяүлеләр дә, шоферлар да сизделәр. Рейдлар атна саен уздырыла, шул исәптән район газетасы журналистлары катнашында да.

Эчке эшләр министрлы­гының Тәтеш районы ЮХИДИ бүлеге начальнигы Марат Галиуллин юл йөрү кагыйдәләрен бозу статистикасын китерде.

"Узган ел районда 21 юл-транспорт фаҗигасе булды, анда 7 кеше үлде, 21е зыян күрде. 3247 административ хокук бозу ачыкланды, шуларның 95е - исерек килеш транспорт белән идарә итү очрагы. 605 шофер тизлек режимын бозды, 602 кеше иминлек каеш­ларын эләктермәгән иде. 2014 елда булган бөтен юл-транспорт вакыйгаларының 6сы - каршы як полосага чыгу аркасында, юл фаҗигаләрендә һәлак булучыларның 2се - шоферларның тизлек режимын арттыру корбаннары, 4 очракта - машина йөртергә хокук­лары булмый торып руль артына утыручылар 4 кешенең гомерен өзделәр, үлемгә китергән бер юл фаҗигасендә исерек шофер гаепле. Юл-транспорт вакыйгасының биш очрагында шоферлар һәм пассажирлар иминлек каешларын эләктермәгәннәр иде".
Марат Галиуллин хәбәр иткәнчә, ел дәвамында җаваплы затларга 9 административ беркетмә тутырылган һәм урам-юл челтәрләрендәге җитешсезлекләрне бетерүгә 7 күрсәтмә бирелгән.
Юл-транспорт фаҗигалә­ре еш була торган урыннар ачыклана, шулар нигезендә постлар, патрульлек итү маршрут­ларының урыннары алыштырыла. Кагыйдә бозучыларны белергә "КРИС-П" һәм "АМАТА" приборлары ярдәм итә. Балаларны махсус утыргычлардан башка йөртүче һәм иминлек каешларын эләктермәүче шоферларны тоткарлауга аерым игътибар бирелә. Ел дәвамында шундый 9 очрак булган. Балалар бакчалары һәм мәктәп­ләр янындагы рейдлар аларның кимүенә булышлык итә.

Үткәрелгән 44 чара барышында юл хәрәкәте кагыйдәләрен бозуның 832 очрагы ачыкланган. Шул исәптән 26 шофер исерек булган, махсус тукталышка 195 транспорт куелган.

Комиссия әгъзаларының шәһәр башкарма комитеты җитәкчесе Дмитрий Пироговка сораулары күп булды. Мәсәлән, язгы су вакытында хәрәкәт иминлеге турында. "Шәһәрлеләр, шул исәптән район газетасын укучыларның тәкъдимнәренә игътибар биреп, - диде Дмитрий Николаевич, - көн саен юллар чистартыла. Бу эш шәһәрнең төньяк өлешендә, башка микрорайоннарда башкарылды. Ул контрольдә".

Иртәнге һәм кичке сәгатьләрдә "Сабый" һәм "Каенкай" балалар бакчалары, 1нче урта мәктәп янындагы урамнарда автомобильләрнең шактый күп булуына бәйле проблемалар кабат яңгырады. Ленин урамы буйлап хастаханәгә кадәр төшүе дә катлаулы. Районның ашыгыч һәм оператив хезмәтләр машиналарына үтеп йөрүнең авыр булуы турындагы мәсьәлә дә күтәрелде. Юл хәрә­кәте иминлеге өчен шәһәр башкарма комитеты җи­тәкчелеге тарафыннан К. Маркс урамы тыкрыгыннан алып Ленин һәм Свердлов урамнары буйлап автомобильләрнең берьяклы хәрәкәтен кертү буенча конкрет тәкъдимнәр әйтелде. Юллар бөтен кирәкле билгеләр белән җиһазландырылачак. Әлеге карар хастаханә шәһәрчеге тирәсендәге һәм урамның "Гастроном"нан 1нче мәктәпкә кадәрге өлешендәге киеренкелекне киме­тәчәк.

Шәһәрлеләр өчен яңа, тагын да уңайлырак автобус павильонын урнаштыру мәсьәләсе тикшерелә.

Комиссия рәисе Аркадий Семенычев билгеләп үткәнчә, шәһәр җитәкчелегенә район архитекторы белән берлектә Ленин һәм Горький урамнарында­гы кибетләргә һәм офис­ларга килү юллары­ның бөтен мөмкинлек­ләрен җентекләп тикше­рергә, җәяүлеләр һәм шоферлар өчен хәвеф-хәтәрне минимум­га кадәр киметергә. Икенче утырыш­та соңгы карар кабул ите­лә­чәк.

Безнең редакция шә­һәр­дә юл хәрәкәте иминлеге буенча укучылары­быз фикерләрен һәм тәкъдимнәрен кабул итә. Газетаның www.tetyushy.ru сайтында урнаштырылган сораштыруда катнашуыгызны сорыйбыз.