Язмышына кеше үзе хуҗа

"Ел башыннан алып безнең инспекция исәбе буенча 105 кеше, ирегеннән мәхрүм ителмичә, шартлы хөкемгә тартылды", - дип сөйли юл уңаенда җәзаларны үтәүне күзәтү инспекциясе өлкән инспекторы Алексей Власов. ­
- Суд, иректән мәхрүм итүгә бәйле булмаган шартлы яки башка җәза билгеләп, кешегә иректә яшәргә һәм эшләргә мөмкинлек бирә, әмма, шул ук вакытта, кайбер чикләүләрне һәм бурычларны, шулай ук җәмәгать тәртибен үтәүне һәм яңа җинаятьләр кылмауны шарт итеп куя, - дип аңлата Алексей Николаевич. - Мәсәлән, хөкем ителүчеләрнең берсе даими яшәү урынын алыштырды - суд тарафыннан йөкләнгән чикләүне бозды. Шуның өчен аңа электрон контроль куллану турында карар чыгарылды.
Йортка килү юлы чиста. Ишекне шакуга 32 яшьлек хуҗа чыкты. Безне ачык йөз белән каршылады, әмма аның кайдалыгын ГЛОНАСС системасы аша хәбәр итүче электрон браслет турында сүз чыккач, азрак борчылды. Җәзаның гаделсезлеге турында ышандырырга тырышты. Тик менә хөкем ителүенең сәбәп­ләре саллы булып чыкты. Исерек хәлдә ул үзенең өлкән туганын, имеш угрылыктан биздерү өчен, туктаусыз "тәрбияләгән". Моның өчен урындык, швабра, чуен таба эшкә җигелгән.
Мировой судья аны, билгеле бер чикләүләр һәм йөкләмәләр белән, шартлы рәвештә 1 ел да 6 айга ирегеннән мәхрүм иткән.
Эшкә урнашу белән проблемалар булуын, бер җирдә дә эшкә алмауларын әйтте. Яшәү урынын алыштырырга, китәргә, яңа хезмәт юлын башларга теләге булуын белдерде. Әгәр мондый фикерләр туа икән, ул чакта аның тормышка ашачагына ышанасы гына кала. Тик менә башта "яшел елан" белән дуслыкны өзәргә кирәк.
Шуннан башка адреслар буйлап киттек. Дөресен әйтергә кирәк, безне һәр җирдә дус­танә каршыладылар, чәй яки каһвә тәкъдим иттеләр. Әмма көтелгәнчә махмыр исе һәм ачулы караш булмады.
Һәркемнең тормышы үз көенә бара. Аларны төрле юллар хөкем ителүгә китергән, әмма, ничек кенә булмасын, һәркайсының, төзәлү юлына басып, үз тормышын үзгәртү мөмкинлеге бар.