Республикада яңа ел каникулларының күпме дәвам итәчәге билгеле булды

(Тәтеш, 18 ноябрь, “Тәтеш таңнары”).

Быел Татарстан халкы өчен яңа ел каникуллары 10 көн дәвам итәчәк. Бу РФ Хөкүмәте һәм ТР Хезмәт, халыкны эш белән тәэмин итү һәм социаль яклау министрлыгы сайтында бастырылган документлардан күренә.

Элегрәк Премьер-министр Михаил Мишустин 2021 елның 31 декабре ял көне булачак, дигән карарны имзалаган иде. Тиешле документ Хөкүмәт сайтында урнаштырылган. Анда 2 һәм 3 гыйнвар шимбә һәм якшәмбегә туры килү сәбәпле, аларны 5 ноябрьдәге җомга көнгә һәм 31 декабрьдәге җомга көненә күчерү турында карар кабул ителде, диелә.