Тәтешле сорый, битлекне салабызмы

(Тәтеш, 3 апрель, “Тәтеш таңнары”). Тәтеш районында яшәүчеләрне соңгы вакытларда Татарстанда битлек кию тәртибенең гамәлдән чыгарылуы хакындагы сорау кызыксындыра.

Без аңлатма сорап Роспотребнадзор идарәсенең Тәтеш, Буа, Апас һәм Чүпрәле районнарында территориаль бүлек начальнигы урынбасары Олег Мазюкинга мөрәҗәгать иттек. 

– ТР Министрлар Кабинетының 2020 елның 19  мартында кабул ителгән карары нигезендә, респуб­ликада кибетләрдә, җәмәгать транспортында, дини биналарда, хезмәт күрсәтү объектларында маска кию тәртибе гамәлдә булуын дәвам итә.

Моннан тыш, РФ Баш дәүләт санитар табибының 2020 елның 16 октябрендә кабул ителгән карары нигезендә, Россия тер­риториясендә яшәүче затлар халык күп була торган урыннарда, җәмәгать транспортында, таксида, парковкаларда, лифтларда сулыш органнарын саклау өчен гигиена битлекләрен киюне тәэмин итәргә тиешләр.

Шулай итеп, маска кию тәртибе Татарстанда федераль нормалар гамәлдән чыгарылганчыга кадәр сак­ланачак, – дип аңлата Олег Алексеевич.