Бәла-каза булмасын өчен

– Янгын еш кына электр белән җылыту җай­­лан­маларының һәм мичнең төзексезлеге яки аларны кулла­ну кагыйдәләрен бозу аркасында килеп чыга, – дип белдерә Россия гадәттән тыш хәлләр министрлыгының ТР буенча Баш идарәсенең күзәтче­лек эшчәнлеге һәм профилактик эшләр ида­рәсенең Кама Тамагы һәм Тәтеш районнары буенча күзәт­челек эшчәнлеге район­ара бү­леге хезмәткәрләре. – Биналарны җылыту өчен электр җылыткыч приборларын, шул исәптән кулдан җитештерелгән җылыт­кычларны куллану, еш кына электр чел­тәрләренең артык йөк­ләнешенә һәм алар­ның өслеге кызып китүгә ки­терә, шуннан соң электр үт­кәргечләрдә ут-күз чыга. 

Әгәр дә сез электр җы­лыт­­кычы кулланасыз икән, аны урнаштыру, файдалану кагыйдәләрен белергә һәм үтәргә тиеш: фәкать заводта эш­ләп чыгарылган электр җылыткычларын гына кулланырга ярый; аларны ягулык материаллары белән томаларга, алар өстендә яки астында керләр киптерергә; аларны янучан әйберләр һәм материаллар янына урнаштырырга рөхсәт ­ителми.

Кабызылган приборларны һәрдаим тикшереп тору зарур, өйдән чыгып киткәндә аларны сүндерергә кирәк, электр җылыткычла­рының энергияне күп сарыф итүен һәм йорттагы электр чел­тәренә зур йөкләнеш ясавын истә тотарга кирәк. 

– Әгәр дә изоляциядә янган ис барлыкка килсә һәм электр чыбыклары, розеткалар, аларның өсте нык кызса, электр счетчигындагы ­саклагычлар даими рәвештә янып чык­са яки сүнсә – бу йорттагы электр челтәрендә артык йөкләнеш бар һәм электр җылыткычны куллану куркыныч дигәнне аңлата, – дип кисәтә Тәтеш халкын дәүләт янгын күзәтчеле­ге белгечләре. – Исегездә тотыгыз, мич­ләрне куллану­­ нормаларын, кагыйдәләрен бозу ке­шеләр гомеренә һәм сәла­мәтлегенә зур куркыныч тудыра. Чистартылмаган төтен юллыклары, мич алдында махсус калай булмау, мичнең штукатуркасы һәм кайбер урын­нары җимерелү, мич яны­нда янучан әйберләр булу – боларның барысы да төзәтә алмаслык бәла-каза китереп чыгарырга мөмкин.