Исәп алуда катнашыгыз

Шундый мөһим чара алдыннан без Яшел Үзәндә (Тәтеш шәһәрендә) дәүләт статистикасы бүлегенең баш белгече-эксперты Анна Җамалетдинова белән әңгәмә кордык һәм аңа берничә сорау бирдек.
– Анна Анатольевна, җанисәп алу ничек узачак?
– Безнең районда Бөтенроссия халык санын алуны үткәрүгә әзерлек эшләре тәмамланды. 7 контролер, 40 исәпкә алучы, 1 инструктор каралган һәм сайланды. Халык турындагы мәгълүматларны җыйганда Роспотреб­­надзорның­ яңа корона­вирус­ инфекция­сен ­профилактикалау буенча күрсәтмәләрен үтәү тәэмин ителәчәк. Халык үзенең даи­ми яшәү урыны буенча исәпкә алына. Ул –  кеше теркәлгән адрес белән туры килергә яки тәңгәл килмәскә дә мөмкин. Халыкны исәпкә алу 2021 елның 1 октябрендә 00:00 сәгатьтә башкарыла – исәпкә алу битләрендәге барлык сораулар исәпкә алу вакытына карата бирелә. Халык санын алу  мәсьәләләре буенча (884373)2-56-03 телефоны аркылы мөрәҗәгать итегез.
– Исәпкә алуда катнашыр өчен кайда килергә ?
– 15 октябрьдән 14 ноябрьгә кадәр стационар исәпкә алу участок­лары эшләячәк, анда исәпкә алуда катнашу яки дәүләт хезмәтләре порталында исәпкә алу узуны раслау мөмкинлеге булмаган яки исәпкә алучы белән үз өендә очрашырга теләмәгән һәркем килә ала. Исәпкә алучылар сораштыруны планшет компьютерлардан файдаланып үткәрәчәк. Кәгазь биттә язып исәпкә алу аерым очракларда гына (мәсәлән, планшет компьютеры сафтан чыккан очракта) кулланылачак.
– Исәпкә алуны читтән торып та рәсмиләштереп булуын ишеткән идек.
– Әйе, дәүләт хез­мәтләренең бердәм порталында, аңа стандарт һәм расланган исәп язуы булучыларның барысы өчен, 15 октябрьдән 8 ноябрьгә кадәр “Халык санын алуда катнашу” хезмәте күрсәтеләчәк. Үзеңә һәм үзеңнең йорт хуҗалыгындагы барлык әгъзаларга исәпкә алу кәгазьләрен, шул исәптән мобиль кушымтада мөстәкыйль тутыру мөмкинлеге булачак. Халык санын алу тәмамлангач, раслау санының коды һәм барлык йорт хуҗалыкларына QR-код булдырылачак. Җанисәбен алучыга исәпкә алу бүлегендә катнашуны дәлилләү өчен исәпкә алуда катнашуны раслау кодларын яки QR-кодны күрсәтергә кирәк.
– Исәпкә алучылар йорт буенча йөриячәкләрме?
– Алар 18 октябрьдән 14 ноябрьгә кадәр торак биналарны йөреп чыгачак. Исәпкә алучыга паспорт тапшырганда гамәлдә булган танык­лык, планшет компьютеры булган зәңгәр сумка, ВПН символикасы төшерелгән жилет һәм шарф, фонарь биреләчәк.