Истәлек аллеясе утырттылар

(Тәтеш, 8 ноябрь, “Тәтеш таңнары”).Безгә бу хакта әлеге урамда яшәүче Юрий Ефремов хәбәр итте. 
– Без күршеләр белән бер-бе­ребезне күптәннән беләбез, бик тату яшибез, безнең арада төрле милләт кешеләре бар, күршеләрнең гореф-гадәтләрен хөрмәт итәбез, чөнки Ватаныбыз уртак бит, – дип уртаклашты ир-ат. – Күрше егете Евгений Нагуськин безнең күз алдында үсеп буй җитте, Ватан сакчысы дигән данлык­лы һөнәрне сайлады. Һәм ул үзенең хәрби бурычын гомере бәрабәренә намус белән үтәде. Күршебез Ольга Михайловна Илларионова аның хөрмәтенә һәм бөек илебезнең башка улларына истәлек буларак безгә аллея утыртырга тәкъдим итте. 26 октябрьдә – Әбиләр һәм бабайлар көнендә – үсентеләр утырту безнең өчен әһәмиятле булды. Аллеяне без күршеләр Николай Артемьев, Тәүфыйк Зәйнуллин, Радик Камалетдинов, Валентина Лукоянова, Мария Макарова, Ольга Илларионова, улы Чечняда һәлак булган Надежда Киселева белән бергәләп утырттык. Әлеге озын гомерле агачлар сугышчыларыбызның каһарманлык һәм буйсынмаучанлык символы ­булсын иде.