Алсу ничек итеп белемле кулланучы булырга кирәклеген белә

(Тәтеш, 11 декабрь, “Тәтеш таңнары”, Лейсан Мантова).Олы Тархан урта мәк­тәбенең 10нчы сыйныф укучысы Алсу Хәя­рова кулланучылар хокукларын яклау буенча респуб­лика олимпиадасында җиңүче булды.

Анда катнашырга те­ләүчеләр елдан-ел арта бара, быел олимпиадага 14 779
укучы гариза биргән. Интеллектуаль турнир августтан октябрьгә кадәр читтән ­торып узган.

 – Олимпиада турында мин 5нче сыйныфта укыганда белдем. Ул чакта без анда катнаша алмадык, әмма өлкән сыйныф укучыларыннан алар ничек әзерләнүләре, бүләкләү тантанасын күрүләре турында еш ишеттем, – дип уртаклаша Алсу. – Һәр елны, 8 сыйныфтан башлап, без – катнашучылар – бергә җыелып, “Кулланучылар хокукларын яклау турында”гы законны өйрәндек. Быел да узган еллардагы кебек үк шөгыльләндек: безне Расих Интал улы (Шагаев – мәктәп директоры. – Автор искәрмәсе.) әзерләде, аның белән бергә без законнарны сайладык, мәкаләләрне карадык, төрле хәлләрне һәм аларны чишү юлларын күзалладык. Җентекле әзерлек нәти­җәсендә без­нең күбебез олимпиада-тестның беренче этабын уңышлы узды. Икенче этапта мин “Экспертиза, кулланучылар хокукларын яклау ысулы” темасына эссе яздым. Үзебезнең тормышта булган очрак турында сөйләдем, анда “Кулланучылар хокукларын яклау турында”гы законны (бу безнең автомобильнең ватылуы иде) белүнең кирәге чыкты. Өченче этапка үтүемне белгәч, мине хис-тойгылар дулкыны биләп алды. Мин аңа тырышып әзерләнә башладым. Һәм каникул­лар вакытында онлайн-конференция башланды, анда ТР Дәүләт алкоголь инспекциясе әгъзалары катнашты. Шушы көнне 10 катнашучы иде, этап 3 көн үткәрелде. Конференция алдыннан бик нык дулкынландым, әмма миңа сораулар бирә башлагач, хафалануны тынычлык алыштырды. Бер атнадан мин нәтиҗәне белдем... Бу әйтеп бетергесез хисләр ташкыны булды. Әле тагын, ничектер берәрсен буташтырмадылармы икән, дигән ниндидер шик-шөбһә дә булды. Олимпиаданы узган вакытта ми­ңа укытучылар, сыйныфташлар, гаиләм ярдәм ит­­те. Өметләрне аклавыма шат­мын. Әгәр җентекләп әзерләнмәгән булсам, бер­нәрсә дә барып чыкмас иде, дип уйлыйм. Олимпиадада шулай ук киләсе елга да катнашырга ниятлим.

Шунысын билгеләп үтәр­гә кирәк, Олы Тархан авылы мәктәбе укучылары әлеге олимпиадада күп еллар дәвамында актив катнашалар һәм кулланучылар белемен югары дәрәҗәдә күрсәтәләр. 

фотоны Алсу Хаярова бирде