Тетюшские зори
  • Рус Тат
  • Изге теләкләр теләнде

    Дүшәмбе көнне, 28 июльдә, шәһәр һәм район авылларында Ураза бәйрәмнәре уздырылды.

    Иртәнге кояш якты нурларына күмеп, офык артыннан күтәрелеп килгәндә халык бәйрәмгә ашыкты. Мәчет манараларыннан йөрәкләрне нечкәртеп, дин кардәшләребезне намазга өндәп моңлы азан тавышы яңгырады: догалар укылды, җыелучылар бер-берләрен изге Ураза бәйрәме белән тәбрикләделәр.

    Гадәттәгечә Тәтештәге үзәк мәчет үзенә күпсанлы шәһәрлеләрне һәм ку­накларны сыйдырды. Ураза бәйрәмен районның имам-мөхтәсибе Инсаф хәзрәт Җәләлетдинов ачып җибәрде. "Рамазан айлары үтеп китте. Тоткан уразаларыбыз һәм укылган Коръән аятьләребез чын күңелдән булсын, тор­мышыбыз­ны бәрәкәт нур­ларына күмсен, күк­лә­ребез һәрчак аяз булып, иминлектә яшәргә язсын. Бу айда изге гамәлләр күп кылынды. Шөкер, мә­четләребездә ифтар мәҗлесләре уздырылды. Ураза бәйрәме алдыннан шәһәр һәм район авыл­лары имамнары, дин кардәшләребез үзәк мәчеткә ахшам намазына җыелды һәм шуннан соң район башлыгы Валерий Чершинцев булышлыгында мәдрәсәдә ифтар мәҗлесе үткәрелде, анда һәрбер имамга күчтәнәчләр өләшенде. Безгә эшләгән изгелекләре өчен Валерий Сергеевичка Аллаһының рәхмәте яусын, Ходай үзен дә олыласын. Барлык мөселман халкын шәхсән үземнән, ТР Диния назәрәте мөфтие Камил хәзрәт Сәмигуллин һәм 15 мәхәллә исеменнән тәбрик итәм. Районыбыз, рес­публикабыз киләчәктә дә гөрләп чә­чәк атсын. Киләсе уразаларны да шатлык белән каршыларга һәм тотарга Ходай насыйп итсен. Мәчетләребезнең ишекләре һәрчак ачык, килегез, намазларга йөрегез. Шулай итеп күңелләребезне пакьләндерик, авыр вакытларда гына түгел, шатлыкта да Раббыбыз­ны искә алыйк", - диде Инсаф хәзрәт.

    Шәһәрнең Кадрия мәчетенә дә халык шактый килде. Район имам-мөхтәсибе ярдәмчесе Сәгыйть хәзрәт Минкин барлык мөселманнарны бәйрәм белән котлап, исәнлек-саулык, гаилә бәхете теләде.

    Ураза гаетләрендә район башлыгы Валерий Чершинцев та катнаш­ты. Ул мәчеттәгеләрне сәламләп, изге гает кө­не белән тәбрикләде, һәр йортта, һәр гаиләдә шатлык һәм дуслык булсын диде. "Районыбызның күп милләтле булуы белән го­рурланабыз. Тәтеш җи­рендә яшәүчеләр җитеш­лектә, тату, бердәм булып гомер кичерәләр, милли гореф-гадәтләрне зур­­лап билгеләп үтәләр, әби-бабаларыбызны хөрмәт бе­лән искә алалар. Бу дуслык һәм имин тормыш безнең җиребездә һәрчак булсын иде. Без бердәм гаилә һәм бу һәрвакыт шулай булачак. Тырыш хез­мәтегез, кылган гамәлләрегез районыбыз һәм республикабыз җитешлеге өчен булсын. Бәйрәм белән!" - диде Валерий Сер­геевич.

    Ураза бәйрәме үтемле вә­газь­ләр белән дәвам ит­те. Аннары гает намазы укылды, Ходай каршында тәкъбир әйтеп, догалар кы­лынды. Соңыннан һәркем бер­берләре белән кул бирешеп хушлашты.
    Аллаһ йортлары иман бай­лыгын тагын да арттырсын, күңел дәфтәрлә­ребезгә изге гамәллә­ре­безне генә язсын иде. Амин.

    Бу көнне Тәтештәге Троицк чиркәвендә дә хрис­тианнарның зур бәйрәме билгеләп үтелде. Казан Митрополиты һәм Татарстан Анастасие Русияне чукындыру көненә гыйбадәт кылу уздырдылар. Чиркәүдә дә, мәчетләрдә Аллаһы Тәгаләдән тынычлык һәм имин тормыш теләп догалар кылынды.

    Нравится
    Поделиться:
    Реклама
    Комментарии (0)
    Осталось символов: