Тетюшские зори
  • Рус Тат
  • Озак еллар бергә яшәү – олы бәхет

    "Бик әйбәт, ярдәмчел кешеләр. Башкаларга карата мәрхәмәтлеләр, ягымлылар.

    Ә инде аралашу - үзе бер шатлык - кәефләр күтәрелеп китә. Василий Егорович та, хатыны Мария Николаевна да җор теллеләр, шаяртырга яраталар", - диде алар хакында авылдашлары Александр, без Ещигановлар өен эзләп авыл урамы буйлап барганда. Мондый сүзләр сөендерде: димәк, барыр юлыбыз дөрес сайланган.
    Менә тау янындагы йортка да килеп җиттек. Сыртын кояшка куеп яткан карт эт машина тавышын ишетүгә теләр-теләмәс кенә кү­тәрелде һәм күзләре начар күрсә дә, тәртип өчен бер-ике тапкыр өреп куйды.
    Бусагаларында журналистларны күреп, Ещигановлар бермәл гаҗәпләнеп куйдылар: "Матбугат игътибарына лаек булырлык нәрсә эшләдек? Ничектер уңайсыз", - диделәр алар, тыйнак кына. Биек болдыр буйлап өй эченә узабыз. Бүлмәләр күп. "Балалар кайталар, оныклар кунак булалар, аларның барсына да иркен булсын өчен янкорма эшләдек", - дип таныштыра хуҗабикә.
    Бүлмәләрдә уңайлы. Тә­рәзә төбендә кызыл роза гөлләмәсе балкып утыра. Аны Бессоновода яшәүче кызы Татьяна әнисенең туган көненә бүләк иткән икән.
    "Бакчасы аллы-гөлле чә­чәкләргә күмелгән", - дип башлый балалары хакындагы әңгәмәне Мария Николаевна. Алар Ещигановларның бишәү: өч уллары һәм ике кызлары бар. Оныклары да биш. "Әмма бу әлегә шулай", - дип төгәллек кертә ул. Хуҗабикә чәчәкләрне бик ярата, тормыш юлы гөлләргә сибелмәгән булса да.
    Кияүгә бик иртә, 18дә чыга. Василий 7 яшькә зур була, әмма әлеге аерманы ул, үзе әйтүенчә, беркайчан да тоймаган, олылар кечеләргә кайгыртучанлык күрсәткәндә бу сизеләме соң инде. Алар кичке уенга чык­кач дуслашып китәләр һәм озак очрашып йөрмиләр, февральдә туй итәләр.
    "Башта өч көн бер йортта, бер атнадан соң икенчесендә өч көн гөрләттек. Туй бик күңелле үтте, кеше күп булды, - дип искә ала хуҗабикә. - Каенана белән 24 ел тату гомер кичердек. Ул йортта терәк булды, балаларны үстерер­гә булышты. Василий токарь булып эшләде, мин фермада 30 ел сыерлар саудым. Барсы да кул хезмәте белән башкарылды. Үзебезнең ху­җалыкта да 3әр баш сыер, дуңгызлар, тавык-чебешләр асрадык".
    - Хәзер дә абзар тулы мал-туар, - дип әңгәмәгә кушыла Василий Егорович.
    Авылда хезмәт күп. Хуҗаларны без өйдә очрак­лы гына туры китердек. Алар якындагы урманга җиләккә барырга ниятләгән булганнар. Тоткарлап тормадык, истәлеккә рәсемгә төшердек тә хушлашып кайтыр юлга кузгалдык.
    Мондый гаиләләр хакында халыкта "эчкерсезләр" дип әйтәләр, ә бу, гаилә йолаларын, олыларны хөр­мәт итүче, балаларны тәрбияләүгә җаваплы мөнәсәбәттә булган тату һәм бердәм дигәнне аңлата. Аларда булган кунаклар да моны тоеп, игелек һәм җылылык хисләренең бер өлешен күңелләренә салып китәләр.
    P.S. 8 июльдә өйләнешсәң, никахың озын һәм бәхетле була дигән ышану бар яшьләр арасында. Тәтеш районы башкарма комитеты ЗАГС бүлеге мәгъ­лүматлары буенча, нәкъ тә менә 6 пар бу көнне никахларын теркәр өчен гариза биргән.
    Аларга бәхетле озын гаилә тормышы телибез.

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: