Хәтер һәм дан бәйрәме

(Тәтеш, 12 май, “Тәтеш таңнары”) Ватаныбыз тарихында  хәтта дистәләрчә ел узганнан соң да кешеләр хәтерендә калырлык вакыйгалар бар. Шуларның берсе – совет халкының Бөек Ватан сугышында Җиңү көне. 

Тәтештә тантаналы чаралар “Җиңү кайтавазы без­нең йөрәкләрдә” дип исемләнгән митинг-концерттан башланды, ул шәһәр үзәгендәге Дан мемориалы янында булды. 

– Җиңү көне – Ватаныбыз­ның азатлыгын һәм бәй­сез­леген яулап алуда көрә­шүчеләр өчен һәр­чак горурлану символы, халкыбызның батырлыгы һәм ихтыяр көче символы, Россиянең горурлык символы булачак. Сугышчыларның батырлыгы турындагы дан мәрхәмәтле нәсел дәвамчыларының йөрәгендә беркайчан сүрел­мәсен, аларны көчле һәм бөек Россия хакына яңа казанышларга рухландырсын иде. Бу көннәрдә миллионлаган россиялеләрнең игътибары Украинадагы вакыйгаларга җәлеп ителгән, анда безнең ир-егетләребез Россиянең Кораллы көчләре составында махсус хәрби операциядә катнаша. Безнең бурыч – нацизмны торгызуга юл куймау, ветераннарның һәм тыл эшчәннәренең батырлыгы хакына Ватаныбыз өстендә тыныч күк йөзен саклау, – диде район башлыгы Рәмис Сафиуллов. 
“ТР муниципаль берәм­лекләр Советы” Ассоциациясе рәисе Әгъзам Гобәй­дуллин Татарстан Респуб­ликасы Рәисе Рөстәм Миң­нехановтан тә­тешле­ләргә котлау сүзлә­рен җиткерде.   

–     Вакыт аяусыз рәвештә алга чаба. Бу коточкыч сугышта катнашучылар елдан-ел кими бара. Хәзерге вакытта исән булган һәр ветеранга мактау һәм хөрмәт белдерәбез, аларның Ватанга фидакярләрчә тугрылыгы, какшамас рухы һәм нык­лыгы безнең өчен үрнәк булып тора. Җиңү көне безнең өчен мәңгегә бәхәссез әх­лакый юнәлеш булып кала­чагына ышанам, – дип бил­геләп үтте Әгъзам Самат улы.  
Җыелучылар һәлак булган сугышчыларны бер минут тынлык белән искә алдылар, Мәңгелек утка чәчәк­ләр салдылар, Дан обелискына һәм тыл эшчәннәре һәйкәленә гирлянда куйдылар. 

Мәктәп укучылары һәм студентлар тигез сафка тезелеп, тантаналы марш атлап мәйдан буйлап уздылар, балалар байракларны май аеның җиләс җилендә җилфердәтеп, горурлык белән күтәреп үттеләр. 

“Үлемсез полк” быел Ин­­тернет киңлекләрендә узуга карамастан, кайбер тәтешлеләр митингка үз­ләренең туганнары – вете­раннарының портретлары белән килделәр. 

– Ирем махсус хәрби операциядә катнашучы булганлыктан, Җиңү көне безнең өчен икеләтә мөһим. Үткәндәге сугыш буынын хәзерге Ватан сакчылары буыны белән берләштерү өчен, үзебез белән бабайларыбыз портретларын алу безгә әһәмиятле булды, – дип уртаклашты Крис­тина Угарова. – Минем бер бабам – Николай Макаров – хәбәрсез югалган, икенчесе – Николай Тимофеев – Җиңү белән кайткан. Мин икесенең дә портретларын алып килдем. Дима да шулай ук үзенең бабасы – Александр Чикилев портреты белән килде. 

Бәйрәм программасы район мәдәният йорты артистлары, җирле үзеш­чәннәр, мәктәп укучылары әзерләгән иҗади номерлар белән тәмамланды. Алар ярдәмендә тамаша­чылар үткәнгә сәяхәт ит­теләр, Бөек Ватан сугышы солдатларының хис-кичерешләрен һәм тойгыларын кичерделәр. Ахырдан “Җиңү көне” җырын артистлар да, җыелучылар да бергәләп башкардылар, аларның күбесе күз яшь­ләрен тыеп кала алмады.