Укытучы якты кояш кебек, күңелләрне назлап җылыта

– Ул укучыларында һәрчак милләтпәрвәрлек, игелек, ихтирам, намус кебек кыйммәтләрне тәрбияләргә омтыла. Балаларны  рухи яктан бай, камил шәхес итеп үстерергә ­тырыша, – дип яза үзенең остазы турында барлык укучылары исеменнән Рамилә Минһаҗева һәм фото тәкъдим итә. 
– Авыл урамы буйлап һәр көн иртән зәвык белән киенгән, төз гәүдәле, мө­лаем йөзле ханым мәктәпкә бара. Авыл халкы, мәктәп  укучылары аны ихтирам итеп исәнләшеп узалар. Сүз авылыбызның олы хөрмәткә лаеклы кешесе – татар теле һәм әдәбияты укытучысы Әхмәтҗанова Миннерауза Мансур кызы турында бара. 
 Әхмәтҗанова Миннерауза Мансур кызы 1966 елның 5 апрелендә Кыргызстан Рес­публикасының Сулюкта шә­һәрендә туа. 1972 елда гаи­лә­ләре бе­лән Олы Тормы авылына күченеп кайталар. 1973 елда Миннерауза Мансур кызы  1нче сыйныфка укырга керә. 1981 – 1985 елларда Тәтеш педагогия училищесында укытучы белгечлеген ала. 
Ниһаять, балачак хыялы тормышка аша! 1985 елда Миннерауза Мансур кызы Олы Тормы сигезь­еллык мәктәбенә башлангыч сыйныф укытучысы булып эшкә кайта. Әйе, хезмәт юлын ул безне, башлангыч сыйныфларны укытудан башлап җибәрде. Әле дә хәтеремдә: яшьлеге, гүзәллеге белән янып торган яңа укытучы безнең нәни тормышыбызга әллә никадәр яңалык алып килде. Мавыктыргыч, кызыклы дә­ресләр, күңелле итеп оештырылган тәнәфесләр, төрле бәйрәмнәр, кичәләр күңелләрдә матур хати­рәләр булып яши.  
 Миннерауза Мансур кызы 1987 – 1993 елларда  Казан дәүләт университетында филология  факультетында читтән торып укыды. 1989 елдан башлап татар теле һәм әдәбиятыннан белем бирә башлады. Ул чын мәгънәсендә,  туган телебезгә һәм  әдәбиятка,  сәнгатькә гашыйк кеше. Аһәңле тавышы, эчтәлекле матур сөйләме балалар күңеленә үтеп кереп, иң нечкә кылларын кузгата алды. Укытучыбызның дәресләре тарихи, фәнни мәгълүматларга  бай булуы белән җәлеп итте. Миннерауза Мансур кызының һәр дәресе яңа ачып укылган китап төсле кызыксындыра, кочак-кочак яңалык алып килә иде. Хезмәтенең нәтиҗәсе буларак, укучылары төрле конкурс, фән олимпиадаларында район һәм республика дәрәҗәсендә уңышларга ирештеләр. 
 Миннерауза Мансур кызы озак еллар мәктәбебездә ди­ректорның тәрбия эшләре буенча урынбасары вазифасын башкарды. Мөгаллимә, җитәкче буларак та, гадел, таләпчән һәм игътибарлы булды. Һәр укучы, укытучы, хезмәткәр  хакында кайгыртып яшәде. 
  Әхмәтҗанова Миннерауза Мансур кызы дәресләрен  һәрчак дәрес­тән тыш  эшчәнлек белән тыгыз бәйләнештә алып бара. Ул  “Мирас”, “Хәят” драма  һәм  “Нәфис сүз” берләшмәләренең җи­тәкчесе. Анда шөгыль­ләнүче балалар район, зона, республика, төбәк этапларында җиңү ­яулыйлар.  
  Миннерауза Мансур кызы – иҗади шәхес. Ул концерт прог­раммалары, сценарийлар төзи,  укучыларга шигырь язу серләрен өйрәтә. Ул үткәргән һәр кичә, сыйныфтан тыш чара матур, тәрбияви, тирән мәгънәле һәм кабатланмас. 
  Миннерауза Мансур кызы үзенә лаеклы ­алмаш әзерли алды. Ул укыт­кан укучыларның  ике дистәдән артыгы укыту­чы һөнәрен сайлады. Алар  район һәм республи­ка­бызның төрле мәктәп һәм балалар бакчаларында, китапханәләрдә, мәга­риф бүлекләрендә эшли. 
 Хезмәтенә күрә хөрмәте дә бар. Әхмәтҗанова Миннерау­за Мансур кызы Татарстан Республикасының Мәгариф һәм фән министр­лыгы Мактау грамоталары, “Мәгарифтәге ка­за­нышлары  өчен” күк­рәк билгеләре белән бү­ләкләнде. 
Хөрмәтле мөгаллимәбез  Әх­мәтҗанова Миннерауза Мансур кызы инде 35 ел  балаларга белем һәм тәрбия бирә. Ничә буын укучыны олы тормыш юлына  озатты. Бүген  аңарда  хезмәт юлын башлаганда укыткан балаларның балалары  белем ала.