Урман эшенең нечкәлекләрен балачактан ук өйрәнгән

(Тәтеш, 20 сентябрь, "Тәтеш таңнары"). Яшь ир-егет һөнәрендә күптән түгел генә булса да, ул урманда эшләү аның вазифасы икәнлеген аңлаган.

Ильяс Алабирде авылында туып-үскән, бүген­гесе көндә Буа шәһәрендә яши, шуңа күрә бер көнгә аңа 120-150 чакрым юл узарга туры килә – Кариле урманчылыгына кадәрге ара якын түгел.

Яшь кеше мәктәп елларыннан ук урман эше­нең нечкәлекләренә өй­рәнгән – аның әтисе учас­ток урманчысы булып эшләгән. Ильяс 2018 елда үзе дә урман мастеры булып хезмәт куя башлаган, ә быелның гыйнварыннан әтисен алыштырган. Бүгенге көндә аның җитәкчелегендә өч мас­тер эшли. “10 меңнән артык гектардагы урманны күзәтеп торабыз, агачлар утыртабыз. Безнең төп хезмәт эшчәнлеге язын һәм көзен башкарыла, шулай да кышын да эшсез утырмыйбыз: орлыклар җыябыз, мәктәп урманчылыклары белән чаралар үткәрәбез, алар бездә икәү. Җәен кисү өчен туры килгән делянканы сайлап куябыз. Урман байлыкларын янгын чыгудан, башбаштакланып кисүдән сак­лауга һәм каравыллап торуга зур игътибар бүлеп бирәбез, кешеләрдә урманга килгән вакытта үз-үзеңне тоту культурасын тәрбияләргә тырышабыз”, – дип сөйли ул. 

Апас, Кама Тамагы һәм Тәтеш районнары урманнары кергән Кариле ­участогы урманчылыгы тер­ри­то­риясендә үзен­чә­лек­ле Юрь­евка тау куышлыгы бар. “Быел аның янәшәсенә шлагбаум урнаштырдык. Матур урын”, – ди Ильяс. 

Яшь ир-ат урманда кыргый хайваннарны еш очратырга була, дип белдерә. Бүреләр кешеләргә якын килми, ә менә кабан дуң­гызлары бернәрсәдән дә курыкмый, өстәвенә әле агачларны бозалар, дип билгеләп үтә. “Эшем миңа ошый. Хез­мәт хакы яхшы. Урманны көзге фасылда күбрәк яратам, матур, яфраклар төрле төсләргә керә, – ди Ильяс. – Иң мөһиме, агачлар булсын өчен хезмәт куячакбыз. Илнең урман байлыгы турында кайгырту гомерлек хезмәтем булыр, дип ­уйлыйм”.