Тетюшские зори
  • Рус Тат
  • Урюм кешесе авылда калырмын дип уйлаган, әмма язмыш үз төзәтмәләрен керткән

    Шәһәрле Анатолий Балантаев үзенә гел яхшы кешеләр генә очрап торды, дип раслый.

    (Тәтеш, 22 октябрь, “Тәтеш таңнары”).Урюм кешесе мәктәптә чакта ук җәйге каникул вакытларында колхозда эшләгән һәм авылда калырмын, дип уйлаган. Әмма язмыш үз төзәтмәләрен керткән.

    Педагогия училищесында укыганда ук көч-кодрәтле студентны күреп алып, аңа оештыру бүлеге – Тәтешнең комсомол район комитеты инструкторы вазифасын тәкъдим иткәннәр. Моның белән беррәттән институтта “Авыл хуҗалыгы предприятиесе икътисадчысы-оештыручы” белгечлеге буенча  читтән торып укыган. “Тормыш кайнап торды, мәктәпләрдә генә түгел, колхозларга да бардык, яшьләр күп иде, кыр, ферма бригадалары оештырылды, төрле иҗади күп чаралар үткәрелде”, – дип ялкынланып сөйли Анатолий Сергеевич.
    Һәм көтелмәгән яңа борылыш: туй көнен бәйрәм иткәндә 21 яшьлек кияү егетен Кошки-Новотимбаевода авыл Советы рәисе вазифасына куялар. Шулай итеп ул җиң сызганып эшкә керешә, ике елдан авыл Советы бинасын төзиләр, почта да шунда урнаша, бу беренче төзелеш объекты була. Яшь ир-ат дүрт елдан парторг булып эшли башлый. “Халык күп иде, колхоз районда сөт, ит, ашлык җитештерү буенча алдынгы урыннарны биләде, – дип сөйли хезмәт ветераны. – Комсомол эшләре актив рәвештә алып барылды”. 

    Түбән Тархан һәм Бессоново авыллары кергән “Искра” колхозында рәислек итү аның тормышында җаваплы һәм тирән мәгънәгә ия вакытлар булган. “Колхоз яңа гына оешканлыктан, баштарак белгечләр дә, техникалар юк иде, – ди Анатолий Сергеевич. – Вакытлар узу белән барысы да җайлашты, машина-трактор паркы тулыланды, барлык җайланмалары булган ындыр табагы төзедек. Терлекчелек алга китте, уңыш нәтиҗәләре сөендерде. Республикабызның беренче Президенты Минтимер Шәймиев безгә дүрт тапкыр килде”. 

    Язмабыз герое авыл хуҗалыгы техникумы директоры, почтамт начальнигы вазифаларында эшләгән. Хатыны Вера Николаевна аның өчен гомер буе терәк һәм ярдәмчесе булган. Алар ике ул тәрбияләп үстергән, хәзер инде оныкларына сөенеп яшиләр.

    Район башлыгы урынбасары ­Евгений ­Курков тәтешле турында болай дип билгеләп үтә: “Анатолий Балантаев – ышанычлы дус, зиһенле икътисадчы, оста җитәкче һәм искиткеч яхшы кеше”. 

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: