“Ярдәм итәргә тырышам”

 (Тәтеш, 21 август, "Тәтеш таңнары", Елена Викторова, автор фотосы).   Ул – шәһәр банкларының берсендә сату буенча менеджер. Гади тел белән әйткәндә, кыз кешеләргә кредитлар һәм карталар рәсмиләштерүдә ярдәм итә.

“Башта авыл хуҗалыгы техникумын кызыл дип­ломга тәмамладым, аннары читтән торып икътисадчы булырга югары белем алдым. Банкта алты елдан бирле эшлим. Оператордан башладым. Беренче вакытта ояла идем, әлбәттә, әмма тора-бара күнектем. Коллектив ярдәм итте, аеруча да җитәкче урынбасары Виктория Алексеевна Рыжова. Тәтештә фатирда яшәдем, аннары машина сатып алдым, хәзер һәр көнне өйгә кайтып йөрү мөмкинлеге бар”, – дип ­сөйли Елена. 
Банк клиентлары арасында төрле яшьтәге кешеләр бар, һәм белгечләргә мө­рәҗәгать итү өчен аларның сә­бәпләре дә төрлечә: кемдер туй уздырырга ниятли, кемдер то­рак сатып алырга җыена, ә кемгәдер ашыгыч рә­вештә бурычларын тү­ләп бетерү зарур. Шуңа күрә һәр кеше­гә дә аерым игътибар кирәк, шулай булгач Елена күпмедер дәрәҗәдә хәтта психолог та, чөнки ке­шеләр аның белән үзләренең борчуларын да, шатлык­ларын да ­уртаклашалар. “Кайчак­ларда арыйм, әлбәттә, әмма эшем миңа ошый”, – ди кыз.

Балачактан ук “мөһим” кәгазьләр белән уйнап, документлар тутыруга бәйле һөнәрне сайлая­чагын күңеленә киртләп кую­ын яшерми. Дөрес, үсеп буй җиткәч, педиатр булырга теләгән мизгелләре булган, ләкин шулай да икътисадчылыкны сайлаган, һәм моңа һич кенә дә ­үкенми.

Шәһәрлеләрнең һәм районда яшәүчеләрнең, шулай ук җитәкчесе Марат Салаватуллинның җылы теләкләре кызның белгечлек сайлауда ялгышмавына ачык дәлил булып тора. ­“Елена Юрьевна – җаваплы хезмәткәр, коллективта хөрмәт итә­ләр, һәм бу банк хезмәткәре өчен әһәмиятле – бер көн эчендә зур күләмдәге эшне башкарып чыгарга өлгерә”, – дип билгеләп үтә ул.  

Сату буенча менеджер булу җиңел түгел: банк тәртибенең барлык нечкәлекләрен аңларга, клиентларга җылы мөнәсәбәттә бу­лырга һәм үз эшеңне яратырга кирәк. Елена Камаева боларның барысын да бик уңышлы башкарып чыга, шуңа күрә тәтеш­леләр тыңлый һәм  шулай ук ярдәм итәргә ашкынып торуын белгәнлектән, аңа мөрәҗәгать итәләр.