Белгечләр кирәк

(Тәтеш, 2 декабрь, “Тәтеш таңнары”). Вакансияләр ярминкәсендә кеше күп түгел иде. Эш эзләүчеләр вакансияләре булган эш бирүчеләр тарафыннан урнаштырылган мәгълүматларны карап йөрделәр. Эшне барыннан да күбрәк аграр сектор вәкилләре тәкъдим итте: авыл хуҗалыгы предприятиеләрендә терлекчеләр, машина белән саву операторлары, ветеринария табиблары, агрономнар, механизаторлар, зоотехниклар, бухгалтерлар җитешми. Шулай ук официантлар, сатучылар, фельдшерлар, башка һөнәрләр дә таләп ителә. Ярминкәгә килүчеләр игътибарына Тәтеш шәһәренең мәшгульлек хезмәте вакансияләре банкы тәкъдим ителде,  ярминкә үткәрелгән вакытта анда 65 урын исәпләнгән. РФның башка төбәкләрендә дә шулай ук 100дән артык вакансия тәкъдим ителгән. Ярминкәгә килгән барлык гражданнарга да интернет-ресурслар аша, шул исәптән “Россиядә эш” гомумроссия вакансияләр базасын кулланып, эш эзләү мөмкинлеге турында мәгълүматлар җиткерелде.

Шәһәрле Вера: “Кибеттә эшләдем, эш сәгате кыенрак. Ике балам бар, башка төрдәге хезмәт эзлим”.

Шәһәрле Сергей: “Озак еллар вахта ысулы белән эшләдем. Кече ватанда хезмәт куясы килә, шофер булып та эшләр идем, барлык категорияләр дә бар”.

Тәтеш районының социаль яклау вәкиле На­талья Фунтова чарага килүчеләр алдында аз тәэмин ителгән гаиләләргә дәүләттән социаль ярдәм күрсәтү турындагы мәгълүматлар белән чыгыш ясады. 

“Социаль яклау органнары һәм  рәсми рәвештә эшкә урнашырга ниятләгән гражданин арасында социаль контракт төзелә, хезмәт хакына айлык түләү 10085 сум тәшкил итә”, – дип хәбәр итте ул һәм әлеге сорау буенча районның социаль яклау органына мөрәҗәгать итәргә тәкъдим итте.

Вакансияләр ярминкәсенә барлыгы 61 кеше килде, катнашкан предприятиеләрнең вакантлы урыннарына алга таба эшкә урнашу өчен 15 юллама бирелде, 44 кеше халык мәшгульлеге законы мәсьәләләре буенча белгечләрдән киңәшләр алды.