Иң мөһиме – йогынты ясау

Тәтеш үзәк район хас­та­ханәсенең табиб – наркологы Наталья Лячен­кова белән без кешене наркотиклар куллануга нинди факторлар этә­рүе, нинди профилактик эш­ләр кирәклеге хакында сөйләштек.  

–     Наталья Анатольевна, Тә­теш районында хә­зерге вакытта наркотик бәйлелектәге ничә кеше бар? 
–     Әлеге сорауга җавап бирүе читен. Күпчелеге үзләренең абруен һәм эшен саклап калырга тели, шуңа күрә аны дәвала­ну учреждениеләреннән чит­тә үз көчләре белән хәл итәргә тырышып, яр­дәм сорап мө­рәҗәгать ит­миләр. Тәтеш үзәк район хастаханәсендә наркотик кулланучы 15 кеше: наркотикка бәйле 1 кеше һәм бер тапкыр кулланып караган 14 кеше исәптә тора. 
Кагыйдә буларак, кеше үзе­нең бәй­лелеген танымый. Аларга көчле йогынты ясарга кирәк, бу тормыш өс­тенлекләрен һәм сәламәт яшәү юлын дөрес сайлау мөмкинлеген бирә.   

–     Наркотик бәйлелеккә кил­гәндә, аңа аеруча да ничә яшь­тәге кешеләр дучар була? 
–     Барыннан ешрак бу 30дан алып 50 яшькә кадәргеләр. Әмма шунысын да онытмас­ка кирәк, яшүсмерләр дөнь­яга карашлары һәм тормыш кыйммәтләре система­ларының өлгереп, җит­легеп бетмәгәнлеге һәм дусла­рының яңа хис-киче­реш­ләрне тоеп карарга кирәк дигән үгетләүләренә җиңел бирешүчән. Моның ятьмәсенә имин булмаган гаиләләрдәге балалар гына түгел, финанс җитешлегендә яшәүчеләр дә килеп каба. Барысы да ата-аналарның бик күп вакытларын эшкә бүлеп бирүеннән тора. Игътибар һәм кайгыртучанлык җитмәүне алар кесәләренә кергән зур суммадагы акча белән каплыйлар, ә моның нәрсәгә сарыф ителүе – игътибардан читтә кала. 
Ата-аналарга мөрә­җәгать итәсем килә: балаларыгызны күзәтегез, чөнки наркотикларга бәй­лелекне башлангыч ста­дияләрдә фәкать туганнары гына ачыклый ала. Аралашыгыз һәм алар­ның яшәеше белән кызыксыныгыз. Яшүсмернең сезгә һәр нәрсәдә ышана алуына, үзенең шатлыклары һәм борчулары белән нәкъ тә сезгә килә алуына аңарда ышаныч уятыгыз.

–     Яшүсмерләрне алкоголь һәм наркотиклар татып карау теләгеннән ничек саклап ­калырга була?
–     Балаларыгыз белән нар­котикларның зыяны турындагы әңгәмәләр уздыруны яшүсмер чактан ук башларга кирәк. Документаль һәм нәфис фильмнар күрсәтү, медицина ягыннан пропагандалау һәм үзеңнең ата-ана бурычыңны үтәү, наркотик­лар кулланып карау теләген киметергә  яр­дәм итә. Иң мөһиме – йогынты ясау. 

–      Әңгәмәгез өчен рәхмәт.