Юл һәлакәтләрен профилактикалау эше алып барыла

–   Альберт Әсхәтович, юл-транспорт һәлакәтләре буенча хәл ничегрәк?

– Агымдагы елның 9 аенда районыбыз тер­ри­ториясендә 5 юл-транс­порт һәлакәте тер­кәлде, анда 2 кешенең гомере өзелде (узган елда үлүчеләр булмады), 4 кеше (узган елны – 7) төрле дәрәҗәдәге им­гәнүләр алды.  
Дәүләт автоинспекция­се бүлеге хезмәткәрләре 9 ай эчендә юл хәрәкә­те кагыйдәләрен бозу­ның 1268 очрагын ачык­ла­ды, шулардан 49ы –
исе­­рек хәлдә транспорт йөртү; 16сы – транспорт йөртү таныклыгы булмаган яки йөртү хокукыннан мәхрүм ителгән килеш транспорт йөртү; 444е – иминлек каешларын куллану кагыйдәләрен бозу; 9ы – каршы як хәрәкәт өчен билгеләнгән полосага чыгу; 152се – җәяүлеләр тарафыннан юл хәрәкәте кагыйдәләрен бозу.    

– Түләмәүчеләргә – юл хәрәкәте кагыйдәләрен бозучыларга нинди чаралар ­кулланыла?

– РФ Административ хокук бозулар кодексының 20.25 нче маддәсендә каралган штрафларны тү­ләмәүчеләргә карата куллану буенча эшләр оештырылды. Әлеге мад­дә буенча ел башыннан 53 кеше административ җаваплылыкка җәлеп ителде. 
Тәтеш районында 10 мең сумнан артык әҗәте булган 12 бурычлы бар. Дәүләт автоинспекциясе бүлеге хезмәткәрләре суд прис­тавлары федераль хезмәте белән берлек­тә һәрберсе белән аерым эш алып баралар: ка­рарларның үтәлеше (штраф­ларны түләү) турындагы мәгълүмат бул­ма­ганда, тиешле мәгъ­лү­мат­лар суд приставлары хезмәтенә вакытын­да җибәрелә; өч рейд үткә­релде, алар барышында бурычлыларның транспортына өч арест ­салынды.

– Юл-транспорт һәла­кәт­ләрен профилактикалау эше буенча сез ниләр әйтә аласыз? 

– Юл хәрәкәте иминлеген тәэмин итү буенча район комиссиясе тарафыннан юл-транспорт һәлакәтләрен һәм юл-транспортта имгәнүне профилактикалау буенча планлы эш алып барыла. Балаларның иминлегенә аерым игътибар бүлеп бирелә. Эчке эшләр бүлеге көчләрен һәм чараларын кулланып, массакүләм мәгълүмат чараларын профилактик эшкә җәлеп итү белән атна саен рейдлар үткәрелә. Агымдагы елның 9 аенда район территориясендә 36 профилактика чарасы оештырылды, шуның нәтиҗәсендә юл хәрәкәте кагыйдәләрен бозуның 114 очрагы ачык­ланды, шуларның 20се – исерек хәлдә транспорт белән идарә итү.
Юллар төзү, яңартып төзекләндерү, ремонтлау һәм файдалану за­коннарының үтәлешен күзәтү нәтиҗәсендә ел­ның 9 аенда юлларның кулланылыш торышындагы җитешсезлекләрне бетерүгә 10 кисәтү ясалды. РФ Административ хокук бозулар кодексының 12.34 нче маддәсе буенча вазифаи һәм юридик затларга карата административ ­хокук бозулар турында 3 эш ­кузгатылды. 

– Балаларның иминлеге район җитәкчелеге өчен аерым бурыч булып тора дигән сүзләр газетабыз битләрендә күп тапкырлар язылды.

– Чынлап та, бу юнә­лештә зур эш алып барыла. Мисалга, районның мәгариф учреждениеләре педагоглары һәм Казан шәһәренең “Юл хәрәкәте иминлеге” дәүләт бюджет учреждение ТИнең профилактика бүлегенең  Буа бүлеге белгечләре тарафыннан балаларның юл-транспорт имгәнүләрен профилактикалау буенча чаралар оештырыла. Балалар бакчаларында һәм мәктәпләрдә даими рәвештә укучылар һәм студентлар белән әңгәмәләр; ата-аналар җыелышлары; юл хәрәкәте буенча мульт­фильмнар һәм видео­дә­ресләр күрсәтү, шулай ук юл хәрәкәтенең яшь инс­пекторлары катнашында акцияләр уза.

Сентябрьдә ­район мә­дәният йортында го­мум­шәһәр ата-аналар җые­­лышы үтте, аның тема­­­ларының берсе – юлларда балаларның иминлеге.
Ел саен Тәтеш райо­нының мәгариф учреж­дение­­ләре өчен автокласс­лар, мобиль һәм база автошәһәрчекләре, беренче ярдәм күрсәтү өчен җиһазлар һәм “Имин тә­гәрмәч” конкурсына әзер­ләнү өчен уку җайлан­малары кебек кыйммәтле җиһазлар сатып алына. 

Мәктәпкәчә белем бирү учреждениеләре сабыйлары һәм башлангыч сыйныфлардагы укучылар яктылык кайтаргыч әйберләр белән тәэмин ителәләр. 

Райондагы һәрбер мә­гариф учреждениеләрен­дә дә диярлек юл хәрәкәте­нең яшь инспекторлары отрядлары булдырылды, алар балаларның юл-транспортта имгә­нүләрен профилактика­лау эшен оештыруда яр­дәм итә, урамнарда һәм юлларда иминлек тәр­тибе кагыйдәләрен киң җәелдерә.  

Дәүләт автоинспекция­се һәм “БДД” ДБУ хез­мәт­кәрләре тарафыннан ел саен Казаннан артистлар чакырып, шәһәр мәктәпләренең башлангыч сыйныф укучылары өчен юл хәрәкәте кагыйдәләре турында спектакль күрсәтү оештырыла.
Балаларны утыртып йөртү район җитәкчелеге тарафыннан көн саен контрольдә тотыла, рейс­ка чыгар алдыннан мәк­­тәп автобусларын йөр­түчеләрнең нинди хәлдә булуы тикшерелә. Алар белән шулай ук даими рәвештә җыелышлар үткәрелә, мәктәп укучыларын йөртү маршрутлары тикшерелә.

– Районда юл хәрәкәте иминлеген тәэмин итү буенча эшләр дәвам итәме?

– Юл хәрәкәте иминлеге мәсьәләсе район башлыгының шәхси кон­тролендә тора. Торак пунктларны төзекләндерү чаралары барышында юллар һәм тротуарлар төзелә һәм яңартып төзек­ләндерелә. Мондый төрдәге эшләр шулай ук республика программаларын гамәлгә ашыру, гражданнарның үзара салымы һәм “Юл хәрәкәте иминлеге” программалары кысаларында алып барыла. Соңгы ике айда гына да Тәтештә, Ленин һәм К. Либкнехт урамнары киселешендә, заманча светофор урнаштырылды, К. Либкнехт, Гагарин, Фрунзе һәм Калинин урамнарында ясалма тигезсезлекләр ясалды, Калинин урамында “Юл бир” һәм “Төп юл” тамгалары куелды. Хәзерге вакытта 2024 елга юл хәрәкәте иминлеге буенча программа эшләнә. 

– Әңгәмәгез өчен рәхмәт.