Россиянең мактаулы юлчысы

Ул Олы Тарханда авыл хезмәтчәннә­ренең күп балалы га­и­ләсендә дөнь­яга килә. Әтисе күмәк хуҗалык­та балтачылар бригадасында бригадир бу­ла, әнисе гомере буе сөт-товар фермасында хезмәт куя.
Егет кечкенәдән үк әти-әнисенә булышыр­га тырыша, өйдә дә, басуда да эшли. Әмма ул күбрәк техникага тартыла, аңа үз куллары белән иске велосипедларны, мопедларны сүтеп җыю бик ошый. Шуңа да, армия сафларында хезмәт итеп кайт­кач, урта һөнәри техник училищега укырга керә, аны тәмамлаганнан соң, киң профильле дипломлы тракторчы-машинист була.
Хәлил 1981 елда Олы Тарханда урнашкан юл участогына эшкә килә, ә ике елдан соң Тәтеш участогына күчә. “Миңа беренче чыгарылыштагы иске К-700 тракторын  бирделәр һәм  мин моңа бик шат идем: аны үзем ремонтладым, бу­я­­дым, – дип искә ала 37 ел стажлы юлчы. – Өч елдан соң яңарак трактор бирделәр, анысы инде чирек гасырга якын миңа тугры дус булды”.
Техника остасы булган ир үз куллары белән тракторның бөтен детальләрен карап чыга һәм тимер ат та хуҗасын сынатмый. Конструктор тоемлавына ия Хәлил Матеев районда беренчеләрдән булып руль җиһазларын үзгәртә, аны уңайлырак урынга күчереп куя.    
Безнең тормыш һәр­ва­кыт хә­рәкәттә, һәм аны юл хуҗалыгы хезмәткәрләреннән башка күз алдына да китереп булмый. “Элегрәк яуган карның иге-чиге булмый, юлны чистартканда, як-якта трактор да күренмәслек булып көрт өемнәре өелә иде, – ди Хәлил Хәлим улы. – Машиналарны тимер атым белән кар тоткыныннан коткарган чаклар да булды, ә бервакыт бала табучы ханым утырган автомобильне авылдан Тәтешкә кадәр озата барырга туры килде”.
Җәйге чорда тракторчы елга аша күперләргә керү юлларын төзекләндерә, дамбаны күтәрә, төрле төзелеш материаллары төяү белән шөгыльләнә.
Хәзер инде ун еллап Хәлил Матеев “Амкодор” фронталь төягечендә эшли. “Бик әйбәт техника, элеккеләре белән чагыштырырлык та түгел, – дип фикер йөртә тәҗрибәле юлчы. – Уңайлы, маневр ясау сәләте дә, җитештерүчәнлеге дә искиткеч югары, йөк күтәрүчәнлеге 25 – 30 тонна булган куәтле машиналарны ун минут эчендә төяп җибәрәм”.
Хәзерге вакытта ул причалда кышкы юлларны карап тору өчен ком төяү белән мәшгуль. Үзе үк 10 тонна комга 4 тонна тоз исәбеннән ком-тоз катнашмасын да әзерли.
Хезмәткәр үз предприя­тиесенең матди-техник базасы бик яхшы булуын билгеләп үтә: гаражларда якты, җылы, территориядә дә чисталык һәм тәртип хөкем сөрә. 
Намуслы хезмәте өчен Хәлил Хәлим улы бик күп рәхмәт хатларына, мактау грамоталарына ия, шулай ук “Россиянең мактаулы юлчысы” исеменә лаек булган һәм “Россия транспортының мактаулы хезмәткәре” күкрәк билгесе белән бүләкләнгән.
“Хәлил Матеев – югары һөнәри белемле кеше, үзенә ышанып тапшырылган эшкә җаваплы карый, коллективта аб­руй казана”, – дип мактап телгә ала аны Тәтеш юл участогы начальнигы Иршат Әхтәмов.
Хәлил Хәлим улы гаи­ләсендә дә бәхетле: хатыны Гөлсинә белән алар кызлары Гөлнараны үстергәннәр, хәзер онык­ларына шатланалар.
Галина ТАҖЕТДИНОВА