Стационарда шартлар яхшырды

(Тәтеш, 16 гыйнвар, “Тәтеш таңнары”). Тәтеш үзәк район хастаханәсе стационарының дәвалау корпусында ремонт эшләре күп башкарылган.

Медицина стационарларын ремонтлау республика программасы ярдәмендә яңадан үзгәртеп корулар барлыкка килә.

Район хастаханәсе баш табибы Ринат Салава­туллин әйтүенчә, меди­цина ­учреждениесе би­­на­ларының тышкы кү­ре­­неше генә  яңарып калмыйча, шулай ук аны яңа җиһазлар белән тулыландыру да бара. 

– Стационар бинасын икенче каттан алып дүртенче катка кадәр капиталь ремонтлау тө­гәлләнде. Безгә район башлыгы Рәмис Хатыйпович Сафиуллов еш килеп йөрде, эш барышы белән кызыксынды, мөһим киңәшләрен бирде. Рамил Гафуров җитәкчелегендәге подрядчы оешма үзен яхшы яктан күрсәткән иде инде, һәм бу юлы да барысын да әйбәт башкарып чыкты. Быел беренче катта да эшләр башкару планлаштырыла. 

Безнең матди-техник база ультратавыш тикшеренүенең яңа аппараты, фиброгастродуоденоскопия аппараты белән тулыланды. Хәзерге заман диагностикасында яңа сүз – күчмә рентгеномплекс – шулай ук хәзерге вакытта безнең табиблар кулланышында, бу экстремаль шартларда тикшерү уздырырга, медицина яр­дәме күрсәтүнең тизлеген арттырырга мөм­кинлек бирәчәк. 
Барлык эшләр дә санитар-эпидемиологик та­ләпләр ни­гезендә башкарылды, аз хәрәкәтләнүче гражданнар өчен уңайлы мохит оештырылды, – дип хәбәр итте баш табиб.
Баш табибның  адми­нистратив-хуҗа­лык эш­ләре буенча урынбасары Мар­сель Нигъмәтуллин әйтүен­чә, электр җайлан­малары, су үткәргеч һәм су агу чел­тәре, җылыт­кычлар капиталь ремонт­ланган, җилләткеч сис­те­малары алыштырылган, янгын сигна­ли­зациясенең автомат сис­темасы урнаштырылган. Моннан тыш, диварлар, түшәмнәр, идән өслекләре яңартылган. Тиздән пассажирлар өчен икенче лифт эшләтеп җи­бәреләчәк.
Баш шәфкать туташы Аэлита Шәмсетдинова белән без стационар бинасы буйлап уздык һәм коридорларның, пала­таларның, персонал өчен бүлмәләрнең ничек үзгә­рүен үз күзләребез белән күрдек. Шунда ук күңелгә ятыш­лы матур төсләр би­зәлешенә, заманча диодлы лампаларның яктылык сирпүенә, плитка түшәлгән идән өслегенә, палаталардагы аяк шумый торган линолеумга игътибар иттек.
Авырулар белән сөй­ләшкәндә, алардан дәвалау вакытында стационарда булу шартлары күпкә уңайлырак булуы турында ишеттек. 
– Бирегә һич кенә элә­гәсе килмәсә дә, шулай да әйтәм, матурлан­ган, барысы да уңайлы, җиһаз­лар  яңа, һәр палатада – санузел, – дип уртаклашты Ямбакты авылыннан Галина Ильина, һәм елмаеп өстәп куйды:  –  Медперсоналның барысы да элеккечә игътибарлы, ярдәмчел, кайгыртучан булып калуы әйбәт.
Медицина хезмәт­кәр­ләре шулай ук яңар­тылган биналарның уңайлылыгын һәм җайлы­лыгын билгеләп үтәләр, һәр катта алар өчен ял итү урыны булдырылган.
     – Ремонт эшләре вакытында безнең хезмәткәрләр тиз арада җайлаша алды. Пациентлар өчен уңайсыз­лыкларны мөмкин кадәр киметү өчен барысын да бердәм рәвештә эшләделәр, – дип билгеләп үтте баш табиб. – Без уртак бер эш башкарабыз һәм кешеләр кирәкле медицина ярдәмен иң югары дәрәҗәдә алсын өчен бөтен шартларны тудырырга тиешбез.