Татьяна Николаева: “Нечкәбил” – ул кызыклы тәҗрибә”
Узган атнада Казанда “Нечкәбил-2021” – “Гаилә формуласы – аналар фәне” XVI республика конкурсының финалы узды.
(Тәтеш, 5 декабрь, “Тәтеш таңнары”, Елена Калашникова). “Нечкәбил-2021” республика конкурсында Тәтеш районын Николаевлар гаиләсе тәкъдим итте.
– Безнең гаилә шактый зур, хәзерге вакытта ул тугыз кешене үз эченә ала: ирем Алексей, балаларым Артем, Константин һәм Ангелина, киленнәрем Снежана һәм Елена, оныкларым Аврора һәм Лев, – дип сөйли Татьяна Николаева. – Без 32 ел бергә гомер кичерәбез. 4 ноябрьдә – Казан Изге Ана иконасы көнендә өйләнештек, хәзер ул әле тагын Халыклар бердәмлеге көне дә.
Татьяна Михайловна – “Миләшкәй” балалар бакчасында музыка җитәкчесе. Бәйгедә катнашырга тора-бара гына ризалаштым ди, әлеге адымны ныклап уйлаган, чөнки “Нечкәбил” бәйгесе алдыннан “Ел тәрбиячесе – 2021” конкурсын узган, аның нәтиҗәләре буенча ул призер булган.
“Нечкәбил” конкурсының финалы Әниләр көнендә үтте, әмма Николаевлар өчен бу юл Чүпрәле районында узган зона этабында чыгыш ясаудан башланган, аннары ярымфинал булган.
– Мин үземнең гаиләм турында казанышларыбыз һәм уңышларыбыз тупланган портфолио әзерләдем. Аннары иншалар конкурсы узды. Ангелина “Әти турында сүз” язды, ә мин –“Әни турында сүз”, Леша белән без әниләребезгә багышланган шигырь иҗат иттек. Нәтиҗәләр буенча, 11 гаилә, шул исәптән без дә, финалга үттек, – дип сөйли Татьяна Михайловна.
Аның әйтүенчә, конкурста билгеле бер нәтиҗәләргә ирешүдә гаиләсенең һәм хезмәттәшләренең булышлыгы ярдәм иткән, алар хәтта Николаевлар белән бер сәхнәдә чыгыш та ясаганнар.
– Балалар бакчасы мөдире Татьяна Николаевна Лубганс – барлык башлангычларда һәм идеяләрдә, Евгений Әхмәдуллин әзерләнгәндә ярдәм итте – ул роликны төшерде һәм монтажлады, районның мәдәният йорты хезмәткәрләре, өстәмә белем бирү үзәге педагогы Екатерина Сергеева һәм аның шәкертләре булышты, Валерий Евдокимов финанс ярдәме күрсәтте. Безне хуплаган барлык тәтешлеләргә дә без рәхмәтле. “Нечкәбил” конкурсы – кызыклы тәҗрибә. Хис-кичерешләр күп сарыф ителде, әлбәттә, шулай да безгә башка гаиләләр белән танышу кызыклы булды. Без алар белән хәзер дә әле аралашабыз.
Конкурс нәтиҗәләре буенча Татьяна Николаева “Рәхмәт, әни!” бәйгесендә җиңүче Дипломы , “Уңыш баскычлары” номинациясендә лауреат Дипломы һәм “Игелекле Нечкәбил” Дипломы белән бүләкләнгән.
фото Николаевларның гаилә архивыннан
Следите за самым важным и интересным в Telegram-каналеТатмедиа
Нет комментариев