Тәтеш районында “Көзге игелек атнасы” тәмамланды
Ел саен үткәрелә торган Бөтенроссия иреклеләр акциясе – иң якты һәм матур чараларның берсе, аның кысаларында өлкәннәргә аерымлап ярдәм күрсәтелде, сугышчылар җирләнгән урыннар җыештырылды, өмәләр һәм башка күп чаралар үткәрелде.
(Тәтеш, 14 сентябрь, Тәтеш таңнары).Изге гамәлләр кылу әллә ни авыр түгел, бу теләсә кайсы кешенең көченнән килә, ә нәтиҗәсе гаять зур. Бары тик кешеләргә карата игътибарлы булырга һәм аларның тормышын күңеллерәк итәргә кирәк.
Мәдәният хезмәткәрләренең көннәре дә игелекле эшләргә бай. Мисалга, Байраш авылы китапханәчесе Тәнзилә Йосыпова күп балалы гаиләләр, ялгыз яшәүче өлкән яшьтәгеләр, сәламәтлекләре буенча мөмкинлекләре чикле авылдашларына бүләкләр һәм китаплар алып барган.
– Каһвә турында уйлаган гына идем, син аны алып килдең дә. Барысы да тормышка аша, – дип рәхмәт белдерә Нурия Әминова Тәнзилә Нәзир кызына, һәм горурлык белән өстәп куя: – Минем 10 оныгым бар. Улым да онытмый, килеп хәлемне белә. Менә “Татар дөньясы” дигән китаптагы өчпочмакларның рәсемнәрен карап утырам әле. Икенче юлы килүегезгә пешереп куярмын – 30 ел повар булып эшләдем.
Олы Тархан авылы китапханәсенең әйдәп баручы китапханәчесе Наилә Әмәчкина авылдагы өлкән яшьтәге ялгыз хатын-кызга кышка утын әзерләүдә булышкан, ә Пролей-Каша авылы китапханәчесе Ирина Краснова авылдагы берьялгызы яшәүче, балачактан сәламәтлеге буенча мөмкинлеге чикле кешегә йортында көзге җыештыру эшләрендә ярдәм иткән.
Иоково китапханәсе китапханәчесе Лилия Арисова “Непоседа” балалар берләшмәсендә катнашучы Екатерина Миронова белән Екатерина Храмова китаплар, журналлар һәм газеталар алып, өлкәннәр янына барганнар.
– Пенсионерлар мондый игътибарга һәрвакытта шатланалар һәм китапханәчене түземсезләнеп көтәләр. Яңа китапның, яраткан журналның үзенчәлекле кыштырдавы, күңелле аралашу – бу алар тормышында юаныч өсти торган кечкенә сөенеч, – дип уртаклаша Лилия Николаевна.
Алекина Поляна авылы китапханәчесе Елена Исаева балаларга мәрхәмәтлелек ул кешеләргә ярдәм итүдә генә түгел, шулай ук табигатькә карата мөнәсәбәттә дә чагылырга мөмкин булуы турында сөйләгән. Балалар парктагы чүп-чарны җыештырганнар, Үләмә елгасы ярын чистартканнар.
– Үсеп килүче буынның тирә-юнь мохитне сакларга һәм кадерләргә өйрәнүе мөһим, – дигән фикердә Елена Николаевна.
Әңгәмә ахырында китапханәче балаларга игелекле гамәлләрне “Көзге игелек атнасы” вакытында гына түгел, мөмкинлек чыкканда һәрчак мәрхәмәтле булырга тырышырга кирәклеге хакындагы киңәшләрен биргән.
Үзәк китапханә хезмәткәрләре “Йөрәктән-йөрәккә” дип исемләнгән игелекле эшләр марафоны үткәргәннәр. Алар “Китапны өйгә” дип исемләнгән китапханә десанты оештырганнар, аның барышында сәламәтлекләре буенча мөмкинлекләре чикле булган китап укучыларның өйләренә барганнар.
Без игелек кылучы, мохтаҗларга ярдәм итүче киң күңелле тәтешлеләрнең хәйрия эшләренең аз өлешен генә мисал итеп китердек.
фото: https://tetushi.tatarstan.ru
Следите за самым важным и интересным в Telegram-каналеТатмедиа
Нет комментариев