Яңа ук елы башланырга бик аз вакыт калып бара

(Тәтеш, 5 август, «Тәтеш таңнары», Мәдинә ИБӘТУЛЛИНА, автор фотолары).  Без кергән вакытта мәктәптә яңа уку елы башлануга соңгы әзерлек бара иде. Коридорлардан, барлык сыйныф бүлмәләреннән буяу исе аңкып тора.

“Мәктәп укучыларны каршыларга, уку елы башлануга әзерме?” – дип сорыйбыз коридорда каршыбызга  оч­раган Бакыр­чы мәктәбе директоры Фәһим Сәлимҗановтан. Югыйсә сорау бирү кирәкмәс тә иде – тирә-юньдә барысы да ялт итеп балкып тора.

“Мәктәпне яңа уку елына әзерләү – җәйге айларда безнең коллективның иң мөһим бурычларының берсе. Бинага косметик ремонт башкарылды, соңгы эшләр төгәлләнү алдында. Педагогларыбыз, аеруча да җыештыручылар Зөһрә Йосыпова белән Гөлнара Халитова зур күләмле эш башкардылар. Алар үз хезмәтләренә җаваплы карыйлар. Зөһрә Әүхәт кызы бездә 1992 елдан бирле алыштыргысыз хезмәт куя”, – дип билгеләп үтә Фәһим Назыйм улы.

Без мәктәпнең һәрбер тә­рә­зәсендә яңа жалю­зи­лар эленеп торуына игътибар иттек, алар уңайлы­лык һәм үзенә бер төрле матурлык өстиләр. Шоколад, зәңгәрсу шәфтәлу, фирәзә... “Шатлык төсләре, – ди мәктәп директоры бина буйлап экскурсия ясап йөргәндә. – Мондый жалюзиларны Мәскәү мәктәпләренең берсендә күрдек һәм безнең уку йортында да шундый булачак дип уйладык. Балаларга укыр­га уңайлы булсын өчен, яхшы шартлар тудырырга тырышабыз. Бүлмәләр компьютерлар һәм мультимедияле җайланмалар белән җиһазландырылган. Бары­сы да федераль дәүләт белем бирү стандартлары таләпләренә һәм санитар таләпләргә яраклаштырылган. Янгын һәм террорга каршы куркынычсызлык буенча чаралар үткәрелгән. Сүз дә юк, теләсә кайсы учреждениенең уңыш юнәлеше – ул иҗади, эшкә сәләтле коллектив, аның көче – тотрыклылыкта. Директор буларак мин үземнең педагоглар белән горурланам: тәҗрибәлеләр, татулар, бердәмнәр. Тулысынча үзара аңлашу хөкем сөрә. Укучыларыбыз да сәләтлеләр, менә, мисалга, безнең чыгарылышлар, алар арасында икесе медальгә лаек булды, – имтихан биргән вакытта бик яхшы нәтиҗәләр күрсәттеләр. Аларның югары уку йортларына керүләре турындагы хәбәрне түземсезләнеп көтәбез, борчылабыз”.

Җәен 21 көн дәвамында мәктәп яны сәламәтләндерү лагере эшләгән, өстәвенә район авыл­ла­рын­дагы мәктәпләр арасында бердәнбер. Ан­да 15 башлангыч сыйныф укучысы ял иткән. Физик культура укытучысы Геннадий Рыжов алар өчен төрле­дән-төрле, үстерүчән, мавыктыргыч һәм файдалы программалар әзерләгән. 
Өл­кән сыйныфларның үз­ләрен хезмәт һәм ял лагерендә чыныктыра алу мөмкинлеге булган. Сүз уңаенда, мәктәп яны учас­тогы ашханәне азык-төлек белән тәэмин итеп тора. Яшелчәләр һәр ел саен үзләренең уңышлары белән сөендерәләр икән, мәсәлән, бәрәңгене узган ел тоннадан артык җыеп алганнар, аш чөгендерен – 420 килограмм, кишер – 240, суган – 150.

“Безнең коллектив Беренче сентябрьне түземсезләнеп көтә”, – диде Фәһим Назыйм улы, безне капка төбендә озатып калганда.