Агрепина Курмышкина авылдашлары белән очрашуга бик тә сөенде
Олы Бисәр мәдәният йорты директоры Галина Курмышкина һәм социаль хезмәткәр Татьяна Шумилкина белән без аны Өлкәннәр көне белән котларга килдек.
Чәй өстәле артында ул яшьлек елларын искә төшерде, тормыш һәм хезмәт юлы турында сөйләде, озын гомерле булуының серләре белән уртаклашты, чөнки аңа 98 яшь. Безгә, мәдәният хезмәткәрләренә, колхозлашу, сугыш елларында һәм үзгәртеп кору чорларында авыл халкының ничек яшәве турында ишетүе кызык та, гыйбрәтле дә булды.
Ни гаҗәп, әбекәй күзлексез укый (өстәлендә "Сувар" газетасы ята), мичкә дә үзе яга. Өендә чисталык, тәртип хөкем сөрә, бу эштә аңа социаль хезмәткәр һәм балалары да, алар әниләре янында еш булалар, ярдәм итәләр.
Агрепина Тарасовна - кунакчыл хуҗабикә, авылдашлары белән дә ихлас аралаша. Кояшлы аяз көннәрдә йөреп керергә яки өе каршындагы эскәмиядә утырырга ярата. Без аңа сәламәтлек, бәрәкәтле гомер һәм якыннарын сөендереп яшәвен телибез.
Следите за самым важным и интересным в Telegram-каналеТатмедиа
Нет комментариев