Артем Хохорин: Хәзерге заман җинаятьчеләре акрынлап Интернетка китә

tetyushy, 16 ноябрь 2019 - 15:05

438

Челтәр алдакчылары хәйләләренә пенсионерлар, яшьләр һәм хәтта банклар хезмәткәрләре дә эләгә, диде Татарстан буенча Эчке эшләр министрлыгы җитәкчесе.

(Казан, 16 ноябрь, «Татар-информ», Егор Никитин). Цифрлы технологияләр үсеше Интернетның төрле җинаятьләр ешрак кылу өчен мәйдан булуына китерде. Хокук бозучылар өчен аноним булу һәм халыкның финанс белеме түбән булу яхшы шартлар тудыра. Бу хакта «Татмедиа» АҖ генераль директоры Андрей Кузьмин белән әңгәмәдә Татарстан буенча эчке эшләр министры Артем Хохорин сөйләде.

«Тулаем алганда, соңгы елларда җинаятьчелек Интернетка китә, һәм шуңа бәйле рәвештә талаулар һәм фатир талаулар азрак булды. Хәзер җинаятьчеләргә үзләрен куркыныч астына куярга кирәкми, башка фатирга керергә кирәкми, анда сигнализациягә эләгергә мөмкин. Аларга компьютер артына утырып, аноним эш итү кулайрак», - диде министр.

Хохорин сүзләренчә, ведомствода яңа цифрлы янауларга җитди карыйлар һәм халык белән аңлату эшләре алып баралар. Аерым алганда, Татарстанда яшәүчеләргә банк мошенникларының корбаны булмас өчен үзләрен ничек тотарга кирәклеген аңлаталар.

«Өстәвенә, элек интернет мошенникларына өлкән яшьтәге кешеләр алданса, хәзер яшьләр дә, хәтта банк өлкәсе хезмәткәрләре дә бу хәйләгә эләгә. Бу чыннан да җитди тема, һәм без аңа беренче ел гына игътибар итмибез», - диде Артем Хохорин.

Соңыннан ул Татарстан буенча Эчке эшләр министрлыгында махсус бүлекчәләр эшләвен, аларның мондый җинаятьчеләрнең күпчелеген тотуын әйтте.

Артем Хохорин белән әңгәмәне тулысынча «Атна вакыйгалары» сайтында укырга мөмкин. Видеоны YouTube та “Татар-информ” каналында күреп була.
Телевизион версияне «Интервью без галстука с Андреем Кузьминым» программасында шимбә, 18.30 һәм якшәмбе, 13.30 сәгатьтә карап булачак.