Балалар тылсым илендә сәяхәттә булдылар

(Тәтеш, 31 декабрь, “Тәтеш таңнары”). Балалар чараның рәс­ми өлеше башланыр алдыннан тылсымчылар “уку йортында” – Хогвартста булдылар. Гарри Поттер үзенең дуслары белән шифалы төнәтмә кайнатырга, шул рәвешле барлык балаларга да талантлар бүләк итәргә уйлады. Хезмәт мичкәсенә сабырлык, ихтыяр, осталык, иҗат, күзаллау, хыял һәм башка күп әйберләрне берләштереп, алар тылсымлы төнәтмә белән әле тагын шактый нәрсәләр ясадылар. Әкияти чара яшь тәтешлеләрне тылсымлы һәм күңелле могҗизалар дөньясына алып керде, якты хис-кичерешләр, шатлык һәм бәйрәм миз­гелләре бүләк итте.

Тәтеш районы башлыгы Рәмис Сафиуллов балаларга сәламләү сүзләре белән мөрәҗәгать итте.

– Сез укуда, спортта, мәдәнияттә һәм сәнгатьтә яхшы нәтиҗәләргә ирештегез. Бу сезнең әти-әни­ләрегез һәм укытучы­ларыгыз ярдәме белән дә мөмкин булды. Сез – безнең горурлыгыбыз. Могҗизаларга ышаныгыз, әмма югары нәтиҗәләргә ирешү өчен хезмәт, тырышлык һәм максатчанлык яр­дәм итүен онытмагыз. Сезгә яңа елда да уңышлар ­телим. 

Район башлыгы ярдәме белән узган бүләкләү тантанасында 100 укучы катнашты. “Фәндә дебют”, “Эрудитлар”, “Актив тормыш позициясе”, “Иҗат салават күпере”, “Спорт үрләре” дип исемләнгән номинацияләр – боларның барысы да балаларның укуда, иҗатта, спортта аерылып торулары һәм башкаларга үрнәк күрсәтүләре турында сөйли.

Тәрбиягә бала алган га­илә­ләрдә тәр­бия­ләнүче, сәла­мәт­лекләре буен­ча мөм­­кинлек­ләре чик­ле балалар үткән атнада “Мог­­җизалар эзләгәндә” дигән искиткеч Яңа ел тамашасында күңел ­ач­тылар.
Матур тамашалар яшь кунакларны тылсымлы дөньяга алып керде, аларга игелек өстенлек итүен күрсәтте һәм Яңа ел могҗизаларына ышаныч өстәде.