Башчылылар бүген Виктор Суровны юбилее белән котлыйлар

Баксаң, Виктор Егорович туган җирендә 44 ел эшли икән.

- Мәктәптән соң ук 1973 елда, миңа 16 яшь иде, колхозда чылбырлы КДП-35 тракторы бирделәр, - дип сөйләп китте ул. - Мин аңарда ярты ел сенаж ташыдым. Нинди генә тракторларда эшләмәдем - төрлесе булды: ДТ, "Алтай", К-700...

- Барлык тракторларда эш­ләргә кайдан өйрәндегез?

- Ул чакта колхозда тракторчылар күп иде бит, бер-беребездән өйрәндек, шулай тәҗрибә тупладык.

Хәзер Виктор Егорович заманча "Нью-Хол­ланд"ны иярли. Үзе әйткәнчә, бишенче сезон "сөрәбез, чә­чәбез, тырмалыйбыз".

Хәтта кыска тәнәфестә дә ял итми - әле эшләргә ярар дип, иске техниканы ремонтларга булыша. Бары тик туган җирен, авыл тормышын яраткан кеше генә шулкадәр гомерен авыр, җаваплы хезмәткә багышлый ала. Хәер, бервакыт Куйбышев өлкә­сендәге Кояшлы поселогы­на китәргә җыендым, дип искә төшерә Виктор Егорович. Тик менә колхозда хезмәт кенәгәсен бирмәделәр, шулай итеп калдым. Ә чынга ашмаган хыялыма бүләк сыйфатында яңа Т-150гә утырттылар.

Ул үз тормышыннан тулысынча ка­нәгать. Хатыны Нина Сергеевна белән, анысы колхозда зоотехник булып эш­лә­гән, 38 ел гомер ит­кәннәр. Аларның ике уллары һәм бер кызлары бар. Сергей өй­лән­гән, Ундорода яши. Ә Александр берничә ел вахта ысулы белән эшләгән дә, моның күңеленә ятмавын аңлаган. Хәзер - комбайнчы ярдәмчесе. 5 августта өйләнгән. Кызлары институтка укырга кергән, укытучы булырга тели. Димәк, бу ел Виктор Егорович өчен әһәмиятле вакыйгаларга бай.

Ә бүген ул һәрвакыттагыча сәгать 6да 2018 ел уңышы өчен туңга сөрергә чыккан.