Беркем дә буш китмәде

Яктырганчы ук төрле товарлар төягән машиналар килә башлады. Сатучылар әйберләрне бик матур итеп өстәлләргә тезәргә керештеләр. Тәтеш ве­те­ринария берләшмәсе бел­гечләре итләрне тик­ше­реп, ветеринария­ бе­­лешмәләре язып бир­­­де­ләр. Шәһәрлеләр кү­ңелләренә ошаган дуңгыз, сыер, кош итләрен сайлап алдылар. Бәрәңгегә сорау зур булды, "Нур" ҖЧҖ һәм авыл хуҗалыгы техникумыннан КамАЗлар төяп килгән икенче икмәкне капчыклап алдылар. Техникум шулай ук бодай, арпа, борчак, көрпә, кишер, кәбестә, чөгендер дә алып килгән. "Кильганов" КФХ өстәле яныннан җилләтелгән балык исе аңкып тора, ул шулай ук печән дә китергән икән, аны сатып алучыларның өйләренә илтеп бирделәр. Ә менә татып карарга куелган балның хуш исе борыннарны кытыклады, шунда ук самавыр чәе дә тәкъдим иттеләр.

"Новая заря" алып килгән арпаны, килосы 6 сумнан, шунда ук алып бетерде­ләр, шофер Гәбделхәй Борһанов кирәк кешегә өйләренә илтеп бирергә тәкъдим итте. Бидәңге җирлеге өстәлендә бишәр килограммлы кәбестәләр тәгәрешеп ята. Ә Федоровкада яшәүче Ирина Хмельникова бакчасында 15 килолы кабак үскән.

Бу көнне ярминкәгә килү­челәр күп нәрсә алдылар. Кулларына зур пакетлар тоткан ирле-хатынлы Безродновлар фикерләре бе­лән уртаклаштылар: "Бу көнне махсус көттек. Сыер һәм дуңгыз ите, 3 литрлы ике банка бал, кәбестә, сөт, эремчек, каймак сатып алдык. Авыл хуҗалыгы эшчәннәре көнендә без­нең бәйрәм өстәле дә сыйлы булачак".

Һәр товар үз сатып алучысын тапты. Шулай­ да иң яхшыларны бәяләргә кирәк булды, моның бе­лән район һәм шәһәр хакимиятлә­ре, авыл хуҗалыгы ида­рәсе, район ветераннар со­ве­ты, ветберләшмә вә­килләре шөгыльләнде. Берничә позициядән чыгып бәя бирделәр: эстетик бизәлеш, бәяләр күрсәткече, товарлар­ның төрлелеге, сатучыларның матур киенүләре.

Уртак фикер нигезендә урыннар түбәндәгечә бил­геләнде: "Нива" ҖЧҖ­га беренче урын бирелде, "Кильганов" КФХ икенче булды һәм алдынгылар өчлегенә Федоровка авыл җирлеге дә керде. Район башлыгы урынбаса­ры Илдар Фәткуллов җиңүчеләргә район баш­лыгының Рәхмәт хатларын һәм акчалата сер­ти­фикатлар тапшырып, барсын да бәйрәм белән котлады һәм мондый яр­минкәләрнең авыл товар җитештерүчеләренә дә, шулай ук сатып алучыларга да файдалы булуын билгеләп үтте.

Ярминкәгә 2 тонна ит, 1,4 тонна агызып сатыла торган сөт, 500 данәдән артык йомырка, 11 тоннадан
артык бәрәңге, 10 тоннага якын башка яшелчәләр, 30 тоннадан артык
бөртек һәм көрпә китерелде.