Эшләмәүче пенсионерларның иминият пенсияләре артты

(Тәтеш, 15 гыйнвар, “Тәтеш таңнары”). РПФның Татарстан Республикасы буенча Тәтеш районындагы клиентлар хезмәте бүлеге белгечләре хәбәр итүенчә, артуның уртача күләме 900 сум тәшкил итә. Иминият пенсияләре билгеләнә торган шәхси пенсия коэффициентының күләме 104,69 сум (2021 елда – 98,86 сум) тәшкил итә. Иминият пенсиясе белән бергә аңа беркетелгән түләү 5,9 процентка индексацияләнә, ул 6401,10 сум тәшкил итә.

– Татарстан Республикасында пенсионерның яшәү минимумы күләме артты, ул 9250 сум тәшкил итте. Барлык эшләмәүче пенсионерларга, матди тәэмин ителешнең гомуми суммасы төбәктәге яшәү минимумыннан түбән булучыларга, 2022 елның 1 гыйнварыннан пенсиягә федераль социаль өстәмә билгеләнә. Әлеге өстәмәне районның 379 пенсионеры ала, аның күләме уртача 2545,09 сум тәшкил итә, – дип сөйләде РПФның Тәтеш районындагы клиентлар хезмәте бүлеге җитәкчесе Ирина ­Большакова.