Гаилә фермасы

Әлеге бизнес белән шөгыльләнү теләге "Алга" хуҗалыгында терлекче булып эшләгәндә - хатыны Гөлнара белән фермада сыерлар сауганда ук барлыкка килә. Икесенең дә күрсәткечләре яхшы була. Ләкин көчле, сәләтле, тырыш иргә үз һөнәр кысалары тар булып тое­ла. Балалар үсеп килә, аларга тиешле белем бирү өчен сыер савучы эш хакы гына җитәрлек булмый. Гаилә киңәшмәсендә дуңгызлар үрчетергә дигән карарга киләләр. Әти-әнисе - Мәхмүт абый белән Флера апа шәхси ярдәмче хуҗалыкны үстерүгә ташламалы кредит алырга киңәш итәләр. Әтиләре гомере буе балта остасы булган, шуңа да төзелеш тәртибен белә. Аның проекты буенча һәм җитәкчелегендә, туганнары ярдәмендә маллар өчен зур җылы абзар салалар.

Кредит акчасы төзелешкә, терлекләр, азык, тагылма техника һәм бортлы УАЗ алуга тотыла. Озакламый аб­зарларда нәселле дуң­гыз балалары йөгереп йөри башлыйлар. Әмма бу тармак тамыр җәя алмый - көтмәгәндә дуңгыз итенең бәя­се төшә, табыш кими. Шул сәбәпле тиешенчә үзләштерелгән юнәлешне - сөт тармагын җәелдерергә карар бирәләр. Сыерлар, таналар сатып алу, печән саклагыч булдыру өчен банктан тагын бер кредит алырга туры килгән.

- Бу кредитлар булмаса, бизнесны үстерүгә өмет өзелер иде, - ди фермер. Соңгы берничә елда ул алты сыер һәм шулкадәр мөгезле эре яшь терлек асрый. Азык әзерләү вакытында күрше хуҗалыкка печән җыюда булыша, ә эшләп тапкан хезмәт хакына азык сатып ала. Ул югында малларны балалары Илназ һәм Эльвина белән хатыны карый. "Фермер" саву аппараты алганнар һәм аның белән эшләре дә җиңеләя төшкән. Улы инде 11нче сыйныфта укый, әтисе кебек үк көчле, таза бәдәнле. Яшь булуына да карамастан, өченче ел район Сабан туе батыры булган.

Хуҗалык табышлыга әйләнә, сөт һәм ит сатудан кергән акча кереме 400 мең сумга җитә. Әмма фермер әле моны чик дип санамый. "Гаилә фермасы" программасында катнашып, ферманы үзгәртеп кору һәм сыер абзарын киңәйтү өчен субсидия алган. Эшләрне ахырынача җиткергәннән соң, биредә 24 сыер урнаштырырга мөмкин булачак. Йортка кадәр асфальт юл сузу да мөһим эш. Әле ул "Лизинг-грант" республика программасы конкурсында да җиңүче һәм шул нигездә төягече булган көпчәкле МТЗ-82 тракторы алачак.

- Мәшәкатьле фермерлык хуҗалыгымның акрын, әмма дөрес үсеш ала баруына сөенәм. Шуңа да киләчәккә өмет белән карыйм, һәр яклы булышлыгы өчен дәүләткә чын күңелдән рәхмәтле, - ди Айдар.