Галимнәр инсультның төп факторларын билгеләгән

(Казан, 17 май, «Татар-информ»). Н.П.Огарев исемендәге Мордовия дәүләт милли тикшеренү университеты галимнәре ишемик инсультның төп факторларын билгеләгән. Бу хакта RT телеканалы хәбәр итә.

Ир-атлар һәм хатын-кызларда инсультны барлыкка китерә торган факторлар төрле булып чыккан. Әйтик, көчле җенес вәкилләре, беренче чиратта, атеросклероз, тәмәке тарту, исерткеч эчемлекләр куллану, метаболик синдром һәм аз хәрәкәтләнү нәтиҗәсендә әлеге авыруга дучар була.

Гүзәл затлар арасында исә шикәр чире, аритмия, симерү һәм дислипидемия (канда липидлар күләменең югары булуы – Т-и. иск.) инсультка китерә. Гипертония ир-атларда да, хатын-кызларда да әлеге авыруга сәбәп була.

Моннан тыш, галимнәр шуңа да игътибар иткән: яшь ирләрдә инсульт яшь хатыннарга караганда ешрак була икән.

https://tatar-inform.tatar/news/2019/05/17/186486/