Тетюшские зори
  • Рус Тат
  • Картлык шатлык булганда

    Шәһәр буасы яныннан узганда эскәмиядә утыручы яки күпердә ял итеп йөрүче олы яшьтәге хатынны күрәм. Көзге кояшлы көннәрнең берсендә аның белән танышырга уйлап янына килдем. Ул сүзгә юмарт булып чыкты, үзен Александра Михайловна Умнова дип таныштырды.

    Тумышы белән - Ульян өлкәсеннән һәм бишенче ел Тәтештә яши икән. "Соңгы вакытларда сәламәтлегем азрак сынатты әле, аякларымның йөрисе килми. Минем өчен борчылып, киявем белән кызым шәһәргә күчеп килергә үгетләделәр", - диде ул.

    Сөйләшә торгач, тиздән аңа 85 яшь тулачагын белдем. Авыр сугыш елларын, шуның аркасында бары 2 сыйныф кына укып калуын, олылардан калышмаска тырышып эшләүләрен һәм озак көтелгән Җиңү килгәннән соң җимерелгән ху­җалыкны торгызуларын хәтерли. "Гомерем буе колхозда эшләдем, грамоталар, рәхмәтләр, са­­на­торийларга юлламалар алдым. Ул чакта колхозлар гөрләп тордылар, кешеләр дә күп иде", - дип, яшьлеген искә төшерүдән тавышы да ачылып китте аның.

    Александра Михайловна, теләсә нинди һава шартларында, көн саен шәһәр буасы янында йөрүе, аның тирә-ягының төзекләндерелүенә сөенүе, тирә-якны күзәтеп, кешеләргә карап эскәмиядә утырырга яратуы турында сөйләде. Яңа өйләнешүчеләрнең "Мәхәббәт агачына" элгән йозакларын санавы да кызыклы икән аңа. "Өстәлә тора бит, - ди ул яктырып китеп, - димәк, тиздән биредә нәни тәтешлеләр белән яшь әниләр үзләре дә ял итеп йөрерләр".

    Хезмәт ветераны авылда калган йортын сагына һәм шулай да: "Җәннәттәге кебек яшим", - дип туктау­сыз кабатлый. Якыннарының ихлас кайгыртучанлыгын һәм хөрмәтен тойган ана аларга бик тә рәхмәтле.

    "Әй, оныта язганмын бит", - диде кинәт, борчылып. Ул яши торган Гагарин микрорайонындагы өлкәннәрне Тәтештәге 1нче урта мәктәпкә очрашуга чакырганнар булып чык­ты. Юл уңаенда Александра Михайловна былтыр шунда баруын һәм аңа ошавын әйтте. "Безгә, картларга зур хөрмәт күрсәттеләр. Мул итеп бәйрәм өстәле көйләгәннәр иде, район башлыгы безнең белән гади генә аралашты, планнар, шәһәрдә тагын нәрсәләр булырга тиеш­леге хакында сөйләде, балалар концерт күрсәттеләр. Пенсионерлар үзләре дә җырладылар, ә кайберләре биеделәр дә, соңыннан бүләкләр тараттылар. Мондый очрашулар безгә бик кирәк, оештыручыларның барсына да рәхмәт", - диде ул җылы итеп.

    Тыкрыкта хушлашканда: "Кая барырга әле? Инде оныттым да", - дип сорады. "Алга таба барыгыз, анда сезне балалар каршы алырлар", - дип җавап бирдем һәм карашым белән аны озатып: "Бөтен көннәрегез якты һәм якыннарыгызның яратуы белән дәвам итсен", дип теләп калдым.
















    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: