Казанда һәм Чаллыда 19 «акыллы» светофор урнаштырылачак

tetyushy, 6 апрель 2024 - 16:32

Быел Казан һәм Чаллы шәһәрләрендә 19 интеллектуаль транспорт системалары (ИТС) – «акыллы» светофорлар барлыкка киләчәк. Алар «Имин сыйфатлы юллар» илкүләм проекты кысаларында гамәлгә кертеләчәк.

ИТС юллардагы «бөкеләр» белән көрәшә, хәрәкәтнең уртача тизлеген арттыра, транспорт агымнарының хәрәкәтен оптимизацияләү исәбенә зыянлы матдәләр чыгуны киметә, дип искәрттеләр ТР Транспорт һәм юл хуҗалыгы министрлыгында.

Татарстан башкаласында шундый 13 система урнаштырылачак һәм Чаллыда - 6.

Әлеге юл хәрәкәте белән адаптив идарә итү системасы, транспорт агымы алдагы юл чатларын мөмкин кадәр тоткарланмыйча уза алсын өчен, барлык светофорларны синхронлаштыра. «Акыллы» светофорлар системасын гамәлгә кертү эшләре «Имин сыйфатлы юллар» илкүләм проекты кысаларында башкарыла.

Россиядә илкүләм проектлар Россия Президенты Владимир Путинның «май указлары» нигезендә 2019 елдан гамәлгә ашырыла.