Кече Әтрәч авылында каз өмәсе уздырдылар

Без барганда авыл уңганнары бердәмләшеп, бик тырышып каз йолкыйлар иде. Казларны Җәмил Мәннанов йоласына туры китереп чалып куя. Хатын-кызлар кайнар сулы казанга манып алалар да, тиз генә калын "тунга" төреп куялар. Ул анда берникадәр парлана, аннары канатларын кисеп алалар һәм муеннарын яхшылап бәйләп йолку урынына озаталар. Ә анда инде һәрберсен чистартып, рәткә тезәләр. Шуннан соң эч-башларын алып чистарталар да, салкын суда яхшылап юалар. 

-Тугыз кеше эшләгәндә көненә утыз каз йолкыйбыз. Бергә-бергә тиз дә, күңелле дә, - диләр өмәчеләр.

Казларның хуҗасы Җәмил Мәннанов әйтүенчә, хуҗалыгында сигез йөз каз бәбкәсе булган. Төлкеләр һәм козгыннар да усалланган. Бераз алардан да зыян күрәләр икән. Шулай да тырышып-тырмашып үстерәләр. Менә урнаштырыр вакыт та җиткән. Монысы сөенечле минутлар дияргә була. 
Рәхәтен, бәрәкәтен күрергә язсын аларга.