Киң күңелле табиб

(Тәтеш, 15 июль, «Тәтеш таңнары»,  Мәдинә ИБӘТУЛЛИНА, автор фотосы). Розалина Закир кызы кебек үз эшенең осталары турында “Ходайдан бирелгән табиб” диләр. Танылган һәм барлык тәтешлеләр тарафыннан хөрмәтләнүче табиб медицинага 40 ел хезмәт куя, балаларны дәвалый. Кешеләрнең күңел түрләреннән чыккан кичерешләре буенча, шәһәрдә һәм районда аны җылы сүз белән искә алмый калган бер генә гаилә дә юк. “Искиткеч табиб”, “үз эшенә тугры белгеч”, “игелекле һәм киң күңелле”, “чын доктор”, – дип тасвирлыйлар аны хезмәттәшләре һәм якташлары. Розалина Закир кызы үзе хакында “кырыс доктор” дип әйтә.

Төп тәтешле 1938 елда Вахитов урамында яшәүче медицина хезмәткәрләре гаиләсендә туа. Розалина Закир кызының әнисе –  Гайшә Гыйниятулла кызы, тәтешлеләр аны Галина Галиевна буларак беләләр, сәламәтлек саклау отличнигы, 30нчы еллардан алып 70нче елларга кадәр бала тудыру йортында озак еллар акушер булып эшли. Кызы да тормыш юлындагы һөнәрен – сәламәтлек саклау өлкәсен сайлауда бер генә дә икеләнеп тормый. Хастаханәдә һәм даруханәдә эшләп тәҗрибә туплый да Казан медицина институтының педиатр бүлегенә укырга керә. Югары уку йортын тәмамлагач, Киров өлкәсендә педиатр бүлеге мөдире булып хезмәт куя, аннары туган шәһәренә кайта. Тәтеш үзәк район хастаханәсендә аны бик җылы кабул итәләр.

Өлкәннәр хәтерләвенчә, 40 урынлы балалар бүлеге Ленин урамындагы ике катлы бинада урнашкан була, хәзер анда – стамотология бүлеге. “Коллективтан уңдым. Без үзара аңлашып, ярдәмләшеп эшләдек. Шатлыгы да, кайгысы да уртак иде. Барлык бәйрәмнәрне дә бергәләп уздырдык, – дип елмаеп искә ала хезмәт ветераны. – Төрле хәлләрне күрергә туры килде. Торак пунктларга теләсә нинди һава торышы шартларында төннәрен дә, кичекмәстән чакырулар буенча да бардык. Ул вакытта юллар юк, атлар һәм тракторларга утырып йөрдек, ә кайчак­ларда җәяүләп тә бардык, бары  авыру бала янына вакытында барып кына җителсен дип тырыштык – Балалар – җир йөзендә иң кадерле, иң самими, саф һәм сөйкемлеләр”.  
Розалина Солтанова СССР Сәламәтлек саклау сис­темасында озак еллар фи­дакарь хезмәте өчен “Сәламәтлек саклау отлич­нигы” билгесе белән бү­ләкләнә, ТАССР, Татарстан  Республикасы Сәламәтлек саклау минис­трлыгы, район җитәкчелеге, үзәк район хастаханәсе администрациясе грамоталары һәм Рәхмәтләрен санап бетерер­лек түгел.

Хезмәт кешесе лаеклы ялда булса да, бер генә дә ямансулап утырмый: йорты чиста-пөхтә, тәртиптә, яшелчә бакчасы – күңеле яраткан урыннарның берсе, һәм чәчәкләр – алар һәр җирдә үсеп утыра: тәрәзә төпләрендә, ишегалдында, бакчада. Әле тагын Розалина Закир кызы дуслары, хезмәттәшләре белән очрашырга ярата. Китап уку, табигать, саф һавада йөрү – ул үзенең кызыксыну мәнфәгатьләрен билгеләп куйган. Шәһәрдә үзләренең “урман дуслары” дип атап йөртелә торган төркемнәре бар, аңарга Розалина Солтанова, Наталья Башина, Галина Харитоновалар керә. Аңа “шаян һәм киң күңелле яшьләр – алтмыштагылар да килеп кушылды”, – дип билгеләп үтә юбиляр. Алар атна саен урманга җиләккә, гөмбәгә һәм илһамланып кайтыр өчен генә дә баралар. Розалина Закир кызы “Атлантида” эшлекле хатын-кызлар клубы эшендә дә бик теләп катнаша. Аңа танып белү лекцияләре ошый, Эрмитаж яңача ачылган, Романовлар династиясе хакында күп нәрсәләр белгән һәм “көмеш гасырдагы” шагыйрьләрнең шигырьләр томын укып чыккан. “Әлегә картаймыйбыз әле!” – ди Розалина Закир кызы.

“Урман дуслары” аны юбилейлы туган көнендә бәйрәмчә күренеш белән сөендергән, күп сандагы тәбрикләүләрдән, шул исәптән студент елларындагы дусларыннан да котлаулар кабул итүдән телефон бертуктаусыз элемтәдә булган. Кунакка элекке хезмәттәшләре дә барды. Тәтеш үзәк район хастаханәсе баш табибы Ринат Салаватуллин Розалина Закир кызын барлык медицина хезмәткәрләре исеменнән юбилее белән тәбрикләп, аңа чын күңелдән сәламәтлек һәм җитеш­лек теләде.