"ТАТМЕДИА" АҖ ел саен үз басмаларына укучыларның кызыксынучанлыгын арттыруга юнәлтелгән акцияләр оештыра.
Мисалга, республика медиа ширкәтенең кимендә өч басмасын яздыручылар арасында призлар уйнатыла. Безнең районнан, ачыкланганча, агымдагы ярты еллык подписка кампаниясе буенча акциядә Тәтеш татар урта мәктәбенең татар теле укытучысы Миңнерауза Әхмәтҗанова катнашты. Аңа төп приз - телевизор һәм башка кыйммәтле бүләк насыйп булмаса да, ул комиссия карары буенча бүләк җыелмасына лаеклы республикабызның төрле районнарыннан җыелган 39 кеше арасында. Педагоглар катнашында без Миңнерауза Мансур кызына әлеге истәлекле бүләкне тапшырдык һәм эшендә уңышлар теләдек.
"Үземне белгәннән бирле, "Авангард" гәҗитен әти-әниләр һәрвакытта алдырдылар. Ә 1985 елдан, мәктәптә эшли башлагач, "Тәтеш таңнары"н яздырам. Аны беренче биттәге яңалыклар баганасыннан укый башлыйм һәм дүртенче биттән төгәллим. Эчтәлекле һәм мәгънәле гәҗит өчен рәхмәт сезгә" - дип уртаклашты көтелмәгән матур бүләк иясе.
Нет комментариев