Кызу эш чоры

(Тәтеш, 16 июнь, “Тәтеш таңнары”). Җиде ел элек хуҗалык­та нибары 500 гектар сөрү җире булган, ә бүгенге көндә авыл хуҗалыгы предприятиесенең биләмәләре 2500 гектар тәшкил итә, 2200е – чәчүгә билгеләнгән, 300е – пар җире.

Кыр-басу киңлекләрен арттыру машина-трактор паркын югары технология­ле техникалар белән тулыландыруны таләп итә, җитәкчелек тә моны яхшы аңлый. Эшне, әйтергә кирәк, яңадан, бер тырмадан башлаганнар.
“Хәзер техника һәм тагылмалы кирәк-ярак­лар белән тәэмин ителгән, – ди “Нива” ҖЧҖ директоры урынбасары Анатолий Сумбаев. – Бер өлешен дәүләт ярдәме программасы буенча сатып алдык, шулай ук үзебезнең акчаны да сарыф иттек”. Әле быел гына яңа печән чабып җыю техникалары: роторлы чапкыч, тыгызлагыч-җыйгыч, теземнәрне әйләндерү-җилләткеч сатып алганнар, рапсны җыю өчен кирәкле булган үзйөреш­ле чапкыч сатып алуга килешү төзегәннәр.

Анатолий Тихонович алдагы елларда ягулыкның, ашламаның, запас частьләрнең бәясе кулай булуын билгеләп үтә. “Нива” ҖЧҖ директоры Марат Фазлыев кебек чын җир хуҗаларын нәкъ тә менә эш сөючәнлек, максатларга ире­­шергә омтылу, төп­ле­ алгарыш, бигрәк тә яраткан эшең белән шөгы­льләнү кебек сыйфатлар аерып тора. Чәчү мәйданнарына һәм­ җитештерелгән про­дук­циядән акчалата та­­­бышка анализ ясап, җи­­­тәкчелек шикәр тамыр­азыкларын чәчү мәйданнарын киметергә, ә рапс чәчүне арттырырга кирәк дигән нәтиҗәгә килә. “Узган елгы 150 урынына 400 гектар чәчтек, – дип сөйли директор урынбасары. – Әгәр зачет авырлыгында 1 тонна тапшырсаң, аның табышлылыгы 100 процент чигендә булачак. Рапска исәп тоттык, югыйсә ТР Авыл хуҗалыгы министрлыгы да берничә елдан бирле майлы культуралар белән шөгыльләнү зарурилыгына катгый рәвештә күрсәтмә бирә. Моннан тыш, соя һәм борай чәчәргә булдык”.

Без предприятиенең тех­нология мәйданчыгында Сергей Сизовны тракторын төзәткән чакта очраттык. “Бу егет сөйләми, ә эшли”, – диде Анатолий Сумбаев. Ул безгә Сергейның бу көннәрдә үсемлекләрне саклау, мең гектардан күбрәк чәчү җирләрен эшкәртүе, урак өстендә “Акрос”та эшләве хакында сөйләде.
Валерий Сизов һәм Александр Крутовның зур тәгәрмәчле тракторы эшкәртү вакытында техникага су, пестицид­лар сала. “1 гектар чәчү җиренә 200 литр су кирәк”, – диләр ир-атлар.

Директор урынбасары хезмәт кешеләре турын­да хөрмәт белән сөйли: “Геннадий Кузин тракторда эшли, Александр Голованов – искиткеч токарь, Сергей Кузин – эретеп-­ябыштыру остасы, Михаил Моськов – атаклы тимерче”.

Без  юл кырыйларындагы хәтфәдәй тигез яшеллеккә игътибар иттек, тиздән ул алтындай басуларга әвереләчәк, һәм­ шул чак күңелдә уй туды: “Мул уңыш җыеп алырга язсын”.