Тетюшские зори
  • Рус Тат
  • Әле барсы да башлана гына

    Узган җомгада Тәтештә яшьлек, хыяллар һәм өметләр бәйрәме булып узды.

    Район 11нче сыйныфлар чыгарылышларын хөрмәтләде, аларга тәүге тапкыр әтиләренең исеме белән эндәштеләр. Күз явын алыр­­лык күлмәкләр кигән кыз­лар һәм затлы бәйрәм кос­тюмнарындагы егетләр кинәт олыгаеп киткәндәй, үзләренә ышанычлары арткандай тоелса да, дул­кынланулары барыбер сизелеп торды. Район­ мәдәният йортындагы мәйданга аларның укыту­чылары, әти-әниләре, ту­ган­нары, дуслары җыел­ды­лар, берсеннән-берсе чи­бәр яшьләргә карап сок­лану өчен үтеп бару­чылар тукталдылар.
    Бүген районның 13 мәктәбеннән алар 122, һәм яшьләр өчен олы тормыш юлын гәүдәләндергән кызыл келәм җәелгән.
    Бәйрәм кичәсе, алкышлар, теләкләр дә - алар хөрмәтенә.
    Район башлыгы Рәмис Сафиуллов аттестатлар, "Аерым уңышлар өчен" медальләр һәм Рәхмәтләр тапшыру тантанасын ачып җибәрде. "Сезне чыгарылыш кичәсе белән котлыйм, - дип мөрәҗәгать итте ул яшьләргә, - укытучыларга, ата-ана­ларга да рәхмәтемне җиткерәсем килә. Сезнең беркайчан да Тәтеш җирен, мәктәбегезне, укытучыларыгызны онытмавыгызны, һәр эшегездә уңышлар гына юлдаш булуын телим".
    Рәмис Хатыйп улы мәктәпне бик яхшы билгеләренә тәмамлаган 15 чыгарылышка медальләр тапшырды, алар 1нче мәк­тәптән Алексей Тимарин, Юлия Гурьянова һәм Ай­гөл Гатауллина; 2нче мәктәптән - Ксения Голод һәм Алинә Миңнегалиева; Алабирдедән - Шамил Гарифуллин, На­зыйл Мингалиев һәм Ра­ил Шәйхетдинов; татар мәктәбеннән - Регина Га­фиятуллина һәм Гөлия Га­лимҗанова; Кил­дештән - Оксана Гурь­янова һәм Ксения Митрюш­кина; Ба­кырчыдан - Гөлүзә Иб­раһимова; Олы Шәмәктән - Алина Лашманова, Олы Тарханнан - Ксения Нет­касова.
    Башлык Рәхмәтен чыгарылышлар гына түгел, балаларын тәрбияләгән ата-аналар да алдылар.
    БДИ буенча рус теленнән 100 балл җыйган укучыларның педагоглары да бил­геләп үтелде, алар Светлана Гыйсмәтулли­на (шәһәрдәге 1нче урта мәктәп) һәм Зөмәрә Ма­ль­кова (Олы Тархан урта мәктәбе).
    "Сез олы тормышка аяк бастыгыз, иң мөһиме - шуннан ышанычлы төстә һәм үзегез өчен файдалы итеп атлап бару. Туган ягыбызны тагын да бай, матур итү өчен, районга белгечләр булып әйләнеп кайтыгыз", - диде, чыгарылышларга аттестатларын тапшырып, райбашкарма комитетының мәгариф бүлеге начальнигы Татьяна Красулина.
    Укытучылар, ата-аналар да ихлас котлауларын һәм җылы теләкләрен җиткерделәр.
    Бәйрәмгә чакырылучылар да алкышларын кыз­ганмадылар, бик күп фо­токамералар тантана­ның иң матур мизгелләр­ен төшереп калырга ашыктылар.
    Музыка, бәхетле елмаю­лар, шат авазлар, модалы прическалар, ефәк күлмәкләрнең җиңелчә кыштырдавы - кызларны хәтта әти-әниләре дә тиз генә танымадылар! Алар бәхетле булачаклар! Чөнки еракта калган 1941 елда табиблар, инженерлар, укытучылар, ар­тистлар һәм хәрбиләр булырга хыял­ланган 17 яшь­лекләр юкка гына үлем­сезлеккә ат­­­ла­маган­нар бит. Бу көн­не андыйлар хакында искә төшерми һич мөмкин түгел, шу­ңа да 2015 елгы чыгары­лышлар Дан Монументына чәчәкләр салырга килделәр.
    - Үземнең 17 яшьлегемне искә төшердем, - дип фикерләре белән уртаклаша Олы Тархан мәктәбе директоры Расих Шагаев, - мәктәбебезне 150 чыгарылыш тәмамлавын хәтерлим, ә бүген 14 кенә. Шулай да алар барсы да әйбәтләр. Мин аларга үземнең "Хуш, мәктәп" дигән яңа җырымны бүләк иттем.
    - Ничәнче чыгарылыш инде?
    - 43нче.
    - Яшьләрнең планнары нинди?
    - Нигездә югары уку йорт­ларына керәчәкләр.
    - Бу көн алар өчен нәрсәсе белән истә калыр икән?
    - Ки­чен алар хөрмәтенә мәк­тәп ишегалдында кеч­кенә генә фонтан ачы­лачак, аны Сөенеч фонта­ны дип атадык. Алар­ның һәркайсы тормыш­та дөрес юл сайлар, дип ышанабыз.
    Балалар тиз үсәләр. Менә Фирдәвес һәм Фәнил Иб­раһимовларның да­ Ба­кырчы мәктәбен тә­­мам­лаган кызлары Гөлүзә бүген аттестат һәм "Аерым уңыш­лар өчен" медале алды.
    - Әле БДИ өчен борчылулар үтеп бетмәде, ә алда яңалары - югары уку йортына керү, - ди дулкынланып һәм шул ук вакытта горурлык хисләре белән Фирдәвес ханым, - безнең кебек барлык ата-ана­лар да балаларына бәхет телиләр, нишлисең, үсеп җиттеләр! Һәм бу да бик матур чор.

    Иң мөһим һәм кызыклы язмаларны Татмедиа Telegram-каналында укыгыз


    Нравится
    Поделиться:
    Реклама
    Комментарии (0)
    Осталось символов: